Pagpamalandong Matag Domingo

Segun sa naandan ang atong Ginoo ang motambong gyud sa mga naandang kalihukan sa adlaw nga ipagpahulay. Lakip na niini ang pag-adto sa sinagoga.

Gibasa niya ang linukot nga basahon diin nabasahan niya kun sa unsang paagi ang katawhan makabaton og kalingkawasan gikan sa bisan unsang matang sa kaulipnan.

Ug human niya kini basaha iyang gilukot pagbalik ang basahon ug samtang naglantaw ang mga tawo ngadto kaniya, iyang giingnan sila nga ang tanang gibasa natuman na gyud mismo sa ilang atubangan.

Kasinatian

Daghan nato ang buot mamahimong gawasnon ug malipayon.

Apan sa tinud-anay lang, daghan nato nga hangtud karon ang nahimong mga ulipon gumikan sa dili makiangayong gambalay ug ingon man sab sa atong mga binuhatan.

Daghan nato ang buot magpabilin sa bilanggoan nga kita usahay ang naghimo kay alang nato usa ka dakong sakit ang makalingkawas sa hawla sa pagpakasala ug pagpalayo sa Dios.

Lihok

Susiha ang imong kaugalingon ug pangutan-a: “Unsay nakapabilanggo nako sa akong daang pagkatawo ug sa kangitngit? Gitugotan ko ba si Kristo Jesus nga mopalingkawas kanako?

Pangamuyo

Ginoo, himoa akong gawasnon. Tungod niini dawata ang akong gugma ug isaad ko talikdan ko ang bisan unsa nga makapalayo nako gikan kanimo.

Ikaw nga buhi ug hari hangtud sa kahangturan.

Amen