Hilabihan ka dako sa shipment sa illegal drugs ang nasakmit sa Philippine Drugs Enforcement Agency PDEA- uban ang Philippine Nationl Police, Navy, Coast Guard, BOC, CPA ug ubang ahensiya sa kagamhanan atol sa gipahigayon nila nga joint random inspection sa pantalan sa dakbayan sa Sugbo kagahapon sa buntag.
Tunga sa sako o 25 kilos nga shabu nga nagkantidad og P170 milyones ang ilang nasakmit gikan sa mag-inahan nga gikan sa Masbate ug gidunggo sa pantalan ang barko nga ilang gisakyan ug dinhi na nasakpan. Gikasakay ang kontrabando sa sedan nga awto dapit sa luyong bahin sa passenger seat sa sakyanan.
Misuway matud pa og likay ang driver sa sakyanan dihang miduol ang mga operatiba sa PDEA-7 ug dinhi na niturok ang ilang pagduda nga adunay illegal nga kontrabando nga sulod niini. Busa gigamit nila ang canine dog nga si Bayani ug didto na nasuta ang ilang pagduda dihang milingkod ang iro human nasimhotan niini nga shabu ang sulod sa dakong karton.
Dunay sulod nga 25 ka dagkong putos sa crystaline substance nga mitimbag og tag usa ka kilo ang usa ka putos. Giayo pa kini og putos og trash bag aron dili mailhan apan wala magsilbe sa ilong sa iro.
Matud sa mga dinakpan nga wala sila masayod nga shabu ang gisakay sa ilang sakyanan gikan sila sa Alabang sa kaulohan diin didto nila gihapit ang karton nga gisudlan sa mga kontrabando, dayon gidala nila nila sa Masbate ug dayon sa pantalan sa dakbayan sa Sugbo.
Gitawagan ra man kuno sila ug wala pud sila motug-an kinsa ang nagpadala sa illegal drugs apan niangkon nga hatagan sila og P20 mil kon madala na destinasyon ang package. Ambot kong tinuod ba ang ilang giestorya. Apan bisan pa og dili sila mopiyait sa mga tawo nga nagpaluyo aning dakong drug shipment, labing seguro silang duha ang mapasakaan og kaso ug dili ra makapyansa tungod sa kadaghan sa kongtrabando nga nakuha gikan sa ilang possession.
Kudos sa PDEA ug sa tanan mga naningkamot nga masumpo ang illegal nga drugas. Kay kong nahitabo pa nga wala kini nasakpan perting daghanan na gyud unya ang mamahimong mora’g zombie kay wala na silang kaugalingon tungod sa pag gamit og illegal nga drugs.
Posible gani kuno nga dunay mga ginagmay nga nangabot sa syudad sa Sugbo atol sa Sinulog alang sa konsumo sa mga mahiliog niini. Unsa kaha og niabot kini niadtong higayona ug nakalusot makapanglingo kita sa sangpotanan sa pag gamit sa illegal drugs.
Asa man gyud gikan kining illegal drugs? Kinsa ang naa sa likod niini? Mga bag-ong drug players o mga nabanhaw nga mga durugista nga subling nag operate human nawagtang ang kanhi berdugo nila nga si Presidente Digong Duterte.
Kong kaniadto nanago sila, karon miarangkada na usab nga maoy dakong hagit sa atong gobiyerno kon unsaon sila sa pagsumpo. Wala man gani sila hingpit nga masumpo kaniadto nga kamot nga puthaw ang gigamit nila, karon pa kaha nga huyang ra kaayo ang approach sa kagamhanan pagsumpo nila.