Binuang nga Bicam
Dili ang blangko nga mga pahina ang kinadak-ang anomaliya sa 2025 budget. Kon dili ang bicameral conference committee. Nga gitahasan ra unta sa paghusay sa nagkasungi nga mga probisyon sa mga bersiyon sa House of Representatives ug sa Senado. Pero nagbuutbuot na hinuon sa paghimo sa ilang kaugalingong budget. Nga lahi sa National Expenditure Program (NEP) nga gisumiter sa Malakanyang ngadto sa House human sa State of the Nation Address (SONA) niadtong Hulyo sa niaging. Ug lahi sa mga bersiyon nga napasar sa House ug sa Senado.
* * *
Lahi sa budget hearings sa House ug sa Senado nga nakita sa publiko pinaagi sa livestreaming sa social media platforms sa Kongreso ug sa media organizations, ang mga tigom sa Bicam gitago gikan sa mga magbubuhis. Gipalili lang ta sa unang tigom niadtong Nobyembre 28 nga wala abti og oras kay igo lang silang nagtukod og technical working group. Gipalili ta pagbalik sa ilang tigom niadtong Disyembre 11 kanus-a gipahibawo nga aprubado nang budget. Walay detalye giunsa pagmaniobra ang gihulagway nga labing kurakot nga budget sa kasaysayan.
* * *
Ang mga kongresista, nga labihan kaisog sa pagbisto sa extrajudicial killings ni kanhi Presidente Rodrigo Duterte ug sa kuwestiyonableng mga transaksiyonsa confidential funds ni Bise Presidente Sara Duterte, labihang hiloma sa makalilisang nga pagburot sa pork barrel sa budget. Sa pikas nga bahin, ang mga senador naglumba pagpangita og planggana. Aron manghunaw og bisan unsang koneksiyon sa pakauwaw. Maong tugoti nga atong ilista ang mga senador ug mga kongresista nga nakatambong sa Bicam.
Ang House contingent nga gipangulohan ni Speaker Martin Romualdez naglakip sa mosunod: Committee on Appropriations chair Elizaldy Co (nga gitaktak na tungod sa bulilyaso), senior vice chairperson Stella Luz Quimbo, Manuel Jose Dalipe, Marcelino Libanan, Aurelio Gonzales Jr., Jayjay Suarez, Neptali Gonzales II, Eleandro Jesus Madrona, Jil Bongalon, Jose Aquino II, Jude Acidre ug Romeo Acop. Ang Senate contingent nga gipangulohan ni Senate President Chiz Escudero naglakip nilang Finance Committee Chair Grace Poe, Senate President Pro Tempore Jinggoy Estrada, JV Ejercito, Cynthia Villar, Mark Villar, Francis Tolentino, Migz Zubiri, Risa Hontiveros, Koko Pimentel, Joel Villanueva, Win Gatchalian, Bato dela Rosa, Bong Go ug Imee Marcos.
- Latest
