Silotan gyud

Angay gyud nga silotan kadtong mga tagdumala sa mga balay patigayon nga nasakpan nga namaligya ra gihapon og ilimnon nga makahubog ug nagpainom nga nasulod na sa gidili nga oras niadtong Domingo.

Ang Executive Order nga giisyu ni Cebu City Mayor Raymond Alvin Garcia nagdili pagbaligya ug pag-inom og mga ilimnong makahubog sulod sa 300 metros gikan sa rota sa prosesyon ug rota sa Sinulog Grand Parade gikan sa Enero 18 hangtud sa 19.

Duna gyud diay walo ka balay patigayon nga nasakpan ug ang mga tagdumala, gimandoan na nga mohatag og pagpasabot ngadto sa kadagkoan sa Cebu City Hall aron ang ilang mga permit dili kanselahon.

Para nako, angay’ng himoon sila nga ehemplo aron nga sa sunod higayon nga mohatag og kamandoan ang mayor dili kay kataw-an lang sa mga tawo.

Si Konsehal Joel Garganera nga maoy gitugyanan sa mayor pagdumala nga mapatunhay ang kahusay ug kalinaw dinhi sa siyudad atol sa Sinulog, wa gani tulog tungod sa gisangon kaniya nga kaakohan.

* * *

Dili maayo ang gipakatap nga mga tabi nga dunay gihimong binuang sa paghimo sa General Appropriations Act 2025, nga kuno dunay mga “items” nga giblangkohan ang “amount” aron kabutangan ni og kantidad nga magamit kuno sa administrasyon.

Misinta tawon si Presidente Bongbong Marcos kay gipasanginlan man siya nga mipirma sa maong GAA 2025 nga dunay mga bahin niini nga blangko ang kantidad. Pastilan, abi ninyo sa dili pa moabot sa Presidente ang GAA aron pirmahan, nag-agi pa kini sa daghang mga tawo nga dili ignorante sa maong trabaho.

Klaro kaayo nga gihimo ang maong gipakatap nga “fake news” aron daoton ang administrasyon ni Bongbong. Kon ako’y pahukmon, maayong ikiha kon kinsa ang naghimo niini kay makapagubot ra ni sa mga opisyal sa atong nasud.

* * *

Sa politika sa Mandaue City, nindot kining kalamboan nga ipaapil gyud sa Korte Suprema ang ngalan ni dismissed Mayor Jonas Cortes sa mga kandidato pagka mayor sa maong siyudad.