Gihulagway sa kagamhanan sa dakbayan sa Sugbo ug sa kapolisan nga malamposon ang Sinulog Festival 2025 celebration bisan pa man og dunay nasinati nga mga kakulian ilabi na sa parada sa karsada diin hilabihan ka langan ang lihok. Gani adunay mga contingents nga wala na modayon sa street dancing, nideretso nalang sila sa pag perform sa Cebu City Sports Center.
Naa pay mga props ug mga floats nga kinahanglan pa putlan og ulo aron makasulod sa arko sa venue nga usa sa nakalangan nga naabtan gyud og tungang gabii..Hinuon sa kadaghan sa mga contingents expected na daan nga dugay gyud mahuman.
Ang importante nga walay dagko nga dautang nahitabo atol sa mga kalihokan kay na-manage man sa mga gipangsangonan sa gimbuhaton. Moingon ang uban nga dunay daghan palpak, yes naa man gyuy lapses kay dili man gyud na kalikayan, walay perpekto nga kalihokan naa gyuy suliran nga motumaw.
Usa sa hinungdan mao ang adjustment sa pagbalik sa venue sa Sinulog karong tuiga kay murag naanaf na ang sestema sa SRP nga template. Ang mga tawo usab nidagsa kay duol ra man kaayo ug convenient sa mga tawo nga dili na kinahanglan magbaklay og layo ug magpainit makasaksi lang sa Sinulog
Ang gidaghanon sa mga tawo miabot kuno og 4 million matud sa CCDRRMO. Apan bisan sa ingon niini ka daghan sa mga tawo napasunod man sa mga otoridad, naay reported nga ginagmay nga kagulyang tungod sa kahubog apan kontrolado ra sa mga otoridad ang sitwasyon.
Sa isyu sa basura, mao man gyud kana ang resulta sa ingon niini ka dako nga kalihokan, pero nabantayan nako nga gisunod man usab dayon sa paghipos, gani ang mga establismento na ang nangunay sa paglimpyo ss mga.hugaw nga anaa sa atubangan nila.
Naay nahinangop nga nabalik sa naandan nga venue apan naa usay nakasaway, bisan asa man ipahigayon ang Sinulog basta sakto ang pagpangandam wala gyuy problema kay ma address man dayon, ma SRP man o Cebu City Sports Center pareho ra gyud nga ok depende ra kon unsay mauyonan sa tawo nga mosaksi sa ingon niini nga kalihokan.
Kay human naman, pahalipayan nato ang tanan nga nalatas nato ang Sinulog nga walay dagkong kakulian. Labaw sa tanan kang Senior Sto. Niño nga maoy nanalipod kanato.