Problema atol sa Sinulog

Hilabihan gyud ka sadya sa Sinulog Festival dinhi sa dakbayan sa Sugbo kaniadtong Domingo. Mas sadya kini kon itandi sa dihang ang Sinulog didto gihimo sa South Properties (SRP) sulod sa miaging tuig ka tuig.

Mas nagustohan gyud sa katawhan nga ang Sinulog anha ra ipahigayon sa Cebu City Sports Center ug sa akong pagpaniid, gisabot ra nila nga makasinati ta og grabeng problema sa traffic atol sa maong kalihokan.

Ang tumong gud unta ni kanhi Mayor Michael Rama nga adto sa SRP ipahigayon ang Sinulog aron nga dunay daku nga lugar alang sa mga manan-aw, apan kay dinalidali man sa paghimo, giyam-iran lang ni sa katawhan.

Ikaduha, pwerteng inita didto sa SRP kay wa man gyuy kay kapasilongan, ug hilabihan kalayo nga kon maglakaw ka, aboton ka na lang og kakapoy nga wa nay gana nga motan-aw.

Sunod tuig, angay’ng planohon pa gyud pag-ayo ang kalihokan aron nga mohapsay pa ang pagpahigayon sa Sinulog. Dugay nga nahuman ang Sinulog kay maalihan man ang exit, ang gawasanan sa sports center.

Kinahanglan man gud nga ang tanang contingents, apil ang ilang mga sakyanan og mga props, mogawas gyud dayon sa sports center human nila og sayaw aron nga makasugod na ang magsunod kanila nga contingents.

Apan unsaon, naghuot man ang mga sakyanan dapit sa exit sa sports center sa P. Del Rosario Street, dili dayon makagawas ang mga contingents. Kada contingents may mga sakop nga dul-an sa 200.

Kini maoy angay nga pangitaan og sulbad sa sunod nga Sinulog 2026. Kabahin sa mga tawo nga dili gyud mopatuo nga dili magpataka paglabay sa ilang mga sagbot, di na gyud tingali na mabangbang.

Bisan pa tingali og magbutang pa’g dagko nga basurahan, di gyud mobiya ang mga tawo gikan sa ilang gitindogan aron paglabay sa ilang mga basura, ug ihulog ra nila sa ilang atubangan ang mga plastic bottles sa tubig ug ubang mga sagbot.

Nagtipun-og ang mga basura sa karsada. Nagkapuliki gyud ang mga DPS personnel pagpanglimpyo kay ang kamandoan ni Cebu City Mayor Raymond Alvin Garcia nga kinahanglang limpyo na ang tibook siyudad inigka buntag.

Banabana nako, sa sunod tuig mosamot og sadya ang Sinulog 2026 kon carousel type lang gihapon ang grand parade unya anha sa Cebu City Sports Center ipahigayon.

Naabtan gyud og alas 11 sa gabii ang grand parade niadtong Domingo apan alegre kaayo, ilabi na ang street parties nga miabot og lapas sa kaadlawon.