Angay lamang nga mohimo og konkretong aksiyon ang lokal nga kagamhanan niining dakbayan sa Sugbo kabahin sa seryoso nga problema sa trapiko panahon sa Fiesta Señor ug Sinulog Festival.
Sa makausa pa, grabe na usab ang problema sa trapiko sa siyudad sa nakalabay nga mga adlaw, gikan sa preparasyon sa fiesta hangtud na sa kasaulogan kagahapong adlawa sa dihang gatusan ka libo ang midagsa gumikan sa tinuig nga Sinulog.
Kada tuig na kini nga dakong krus nga gipas-an sa katawhan. Hinuon expected kana gumikan sa hilabihan ka daghan sa mga debotos nga modagsa sa dakbayan aron pagsaulog sa kapistahan ug pagsaksi sa Sinulog.
Alang sa mga Katoliko ug mga debotos ni Señor Sto. Niño, angay lamang nga mosakripisyo una ang katawhan sa dakong suliran sa trapiko pahahon sa Sinulog. Tungod kay, alang kanila, pahinungod kini sa kahitas-an.
Nakasabot kita niana. Dili gayud malikayan ang dakong problema sa trapiko panahon sa fiesta ug Sinulog. Ug kabahin na kana sa selebrasyon sa labing dakong relihiyosong kalihokan sa Sugbo.
Apan ang akong punto mao nga kinahanglan adunay konkretong lakang gikan sa lokal nga kagamhanan aron matibhangan ang grabe nga problema sa trapiko pahahon sa Fiesta Señor ug Sinulog Festival.
Kini sama pananglit sa pag-ban sa mga trailer, trak de karga ug ubang dagkong delivery truck sa nag-unang kadalanan sa siyudad sa Sabado ug Domingo, mismo sa adlaw sa kapistahan.
Ako mismo nakasaksi kon unsa ang dakong contribution niining dagkong mga truck sa kahuot sa trapiko. Samtang padulong ko sa opisina sa niaging adlaw, dugay gyud nga miirog ang akong sakyanan tungod sa dagkong mga truck nga motabok o moliko sa S. Osmeña Boulevard.
Simple lamang kini nga sugyot apan dako kini og impact sa paningkamot sa lokal nga kagamhanan nga matibhangan ang problema sa kahuot trapiko panahon sa Fiesta Señor ug Sinulog Festival.