Sunog bisan asa

Nabaniog ang California gumikan sa wildfire nga nahitabo. Ning bag-o lang naapektuhan na pud ang northern California ug lakip na niini ang planta nga daghang mga bateriya.

Ang Hong Kong usab nakasinati usab sa giingong wildfire ingon man ang Argentina.

Sayud kita nga dili lang kining mga dapita nga atong gihisgotan ang nakasinati sa ingon, tingali mas daghan pa apan wala lang masibya.

Wala pay labot ang balita nga ang Africa ang paspas nga natunga gumikan sa mga kalihukan sa mga tectonic plates niini ingon man ang kalihukan sa mga bulkan. Ang atong adlaw nisulod na sa iyang solar maximum ning tuiga 2025. Silot na ba kini gikan sa langit?

Human sa hataas nga panaw gikan sa Norte gabii nako nahiuli sa kumbento. Pagsulod nako sa akong lawak katulganan akong gisud-ong ang akong palibot. Tataw kaayo ang pagkaguliyang. Hinuon, anad nako niining maong talan-awon sanglit kun han-ayon maglisud naman nuon ko og tultol. Tingali idol lang gyud nako si Fr. Mon.

Apan ang maong talan-awon maoy mohulagway sa kalibotan nato karon.

Dili lamang sa mga nagkabanging mga ideolohiya ug mga baruganan kun dili literal usab ang atong planeta nagkaguliyang usab. Ang climate change, global seismic unrest ingon man ang padayong pag shift sa atong magnetic pole.

Gani matud pa, nipaspas og tuyok ang atong planeta. Mga panghitabo kini nga nihinay hinay og tumaw. Ug way seguro kita makasud-ong pa niini sa atong kapanahonan.

Ug kun mahitabo man kini bugtong atong mabuhat mao ang pagdawat ingon man pag-ampo nga unta makalahutay kita sa pag-antos ug dili kita malisang sa mahitabo.