Hunghong sa demonyo

Tulo ka kinabuhi ang dihadiha nakalas samtang usa ang anaa sa kritikal nga kahimtang sa pagpamusil nga nahitabo sa sitio Looc Barangay Maribago sa dakbayan sa Lapu-Lapu niadtong alas otrso sa gabii sa Sabado. Ang responsable usa ka 41-anyos nga lalaking sabog sa illegal nga drugas kinsa namusil sa mga tawo kutob sa iyang matagboan ug makaagi sa ilang pinuy-anan.

Una niyang gipusil ang lalaki nga iyang gikabikil kinsa iyang natagboan, samtang ang sunod mao ang usa ka babayeng lending collector nga nakaagi lang sa ilang punoy-anan gipusil sa ulo kaduha ka higayon aron maseguro nga mapatay gyud.

Samtang ang laing biktima usa ka lalaki nga nagsakay og motorsiklo nga nakaagi usab sa ilang balay. Luoy intawon kaayo kay gikan kini nagpalit og tambal sa iyang dos-anyos nga anak nga adunay balatian apan wala kaabot sa ilang balay human naigo sa ulo dihang gitarget sa pagpusil sa suspek.

Ang ikaupat nga napusilan iya ra usab nga silingan nga naigo sa nawong apan nadala sa tambalanan.

Human sa pipila ka oras nga negosasyon sa kapolisan nadakpan ang suspek ug nakuha sa iyang possession ang usa ka kalibreng armas nga maoy gigamit niya sa krimen.

Bangag pa kaayo sa illegal nga drugas nga nagpataka nalang og yawyaw. Maayo gani kay diha ang iyang pamilya dihang gisikop sa mga pulis kay kong wala pa ambot nalang basin ingnon to nga nisukol maong gidakop nga buhi ang suspek.

Nahinabi nako ang suspek, nitubag sa akong mga pangutana apan simang pa kaayo kay wala pa katugpa sa drugas nga iyang gisuyop.

Matud niya naggamit siya og shabu sa wala pa mahitabo ang krimen ug ang hinungdan sa iyang gihimong pagkutlo sa kinabuhi sa mga biktima mao nga gihunghungan siya demonyo.

Pastilan lami kaayo gyud panitan tawhana sa iyang gihimo adunay mga anak nga nailo human gipamatay niya ang mga tawong inosente tungod lang sa iyang bisyo. Aminado siya nga dugay na nga gasuyop og shabu, gani katulo ka higayon nga nasulod siya sa prisohan tungod sa illegal nga drugas.

Matud sa iyang maguwang nga kalbaryo kaayo nila kining suspek kay sila mismo magkurog sa kahadlok kong maka-shabu na kini kay dili naman makaila ug nahitabo gyud ang ilang gikahadlokan diin gipamatay sa ilang igsuon ang mga inosenting tawo. Kong sila ang pagbut-on ipadugta nila sa prisohan ang ilang igsuon tungod sa nahimo niini.

Ang nahitabo sa Maribago nagpakita lang kong unsa ka grabe ang epekto sa illegal nga drugas kay bisan wala kay sala kong matungnan diay ka sa tawo nga ulipon sa espirito sa drugas mamahimong ikaw ang mabiktima. Mas nigrabe karon kining problemaha.

Kaniadto ang mangamatay kadtong mga durugista man, karon ang mga inosente'ng tawo gipamatay sa mga drug addict.

Makapangandoy naman lang ang uban nga mabalik ang panahon nga nanago ang mga nalambigit sa illegal drugs kay sila gipangluitos ug gipamatay.

Apan karon balik na sila sa ilang happy life kay mora’g sila naman ang pinangga karong panahona, special treatment pa gani ang uban didto sa balay balaoranan dihang gihimong testigo batok sa kanhi pangulo.

Unsa kahay sangpotanan aning tanan nga mora’g dili naman matarog ang mga durugista karong panahona?