Bigay-bawi

Hagbay rang gipahibalo ni Presidente Bongbong Marcos Jr. (PBBM) nga supak siyang ipa-impeach si Bise Presidente Sara ‘Inday’ Z. Duterte.

Kay kining maong kalihokan makaguba lamang sa kahiusahan sa katawhan ug makahatag dakong kagubot nga mosangko sa pagkabahinbahin sa mga lider ug iya-iyang mga dumadapig.

Ug gisuportahan siya sa mga kadagkoan sa Iglesia Ni Cristo (INC).

Giklaro sa INC. nga ilang rally, para sa kalinaw ug kahiusahan sa tanang Pilipino, diin bukas kini sa tanang sektor, partido, relihiyon ug ni bisan kinsang gustong mosalmot.

Aron ipruyba sa INC nga ang ilang rally, peaceful and godly, aniay pipila sa nahisulat sa mga plakards nga ilang gipangdala:

‘Pagkakaisa, hindi pamolitika!’ ‘Bayan ang asikasuhin, hindi sariling mithiin.’, ‘Pagkasusundo, hindi pagkagugulo.’, ‘INC is for unity’, ‘Pagkakaisa sa gitna ng pagsubok.’

Well-organized ang INC. Kon unsa kalimpiyo ang kinatibuk-ang lapad hawanan sa Qurino Grandstand sa ilang pag-abot, mao pod ang kalinis sa ilang pagbiya. Sanglit, may mga miyembro nang giasaying tiglimpyo. Usab, may mga Kristiyanos, pro-DDS, KOJC members ang miapil, kinsa ilado na sa ilang pagka bokal, ang wala nila hatagig higayong makagunit og mikropono sa stage kay basig mosiyagit og ‘Marcos, resign!’ Na, maguba-masubersibo ilang peaceful rally!

Ug milampos ba ang INC sa ilang dakong pagsupak sa Sara Impeachment?

Niining bag-o, mipagawas og bag-ong statement si PBBM nga pabor gyod siyang ma-impeach si Inday. Nan, unsa kahay next move sa INC niining pagsuol na usab sa naandang sakit sa utok ni PBBM? 

Mag-peaceful rally ba gihapon sila, bisag ilang seryosong panawagan, giduladulaan ra niining gibunyagag bangag sa pro-good governance vloggers ug nasuko nang katawhan?

Or panahon na usab sa kinatibuk-ang simbahang Katoliko, Kingdom og Jesus Christ ug mga dagkong lider sa tanang relihiyon sa pagpasiugdag mas dako pang rally nga dili ra kutob sa Qurino Grandstand, kondili, magmartsa lahos ngadto sa Malakanyang?

Retired generals, kinsa kapila na mopirmag manifesto nga paresayinon na si PBBM, ready na ba mo sa pagprotehir sa mga magmartsa ingkasog mahitabo kini? Or, nahadlok kamo ni Brigade Gen. Nicolas Torre III, kinsa mipayil og sedition complaint batok kang Ret. Capt. Clemente Dado Enrique?

Unta, dili lang kamo kutob sa palaming istorya, generals. Buhata gayod!