Yukbo ni Santo Niño

Bata pa ko nga tigsimbahan na gyud ug nabatasan nako nga tagsa ra mohuman pagpaminaw og misa, apan seryoso ko nga mag-ampo direkta sa labaw’ng makagagahum.

Sa bata pa ko, kada Domingo molakaw ko og mga tunga sa kilometro aron limpyohan ang kapilya sa among sitio nga ang Patron San Isidro Labrador.

Trapohan nako og binasa nga panapton ang mga imahen sa santos, ug silhigan ang sulod sa kapilya nga usahay butangan og mga kanding sa mga tawo nga way respito sa mga santos.

Dihang dinhi na ko sa siyudad, nabatasan nako nga mosulod gyud sa Cathedral, usahay sa Basilica del Santo Niño ug sa ubang mga simbahan aron mag-ampo.

Tuig 1981, dunay mihatag kanako og imahen ni Santo Niño. Mao kadto nga gikan niadto, gihimo ko na nga idolo si Santo Niño, ilabi na nga niadtong panahona ang Santo Niño pa maoy giila nga patron sa Sugbo.

Kada lakaw nako, alsahon nako ang gamay’ng imahen ug akong hagkan, ug mananghid ko nga molakaw. Ini'g abot nako inigka gabii, hagkan na sab nako ug moingon ko nga “Santo Niño dia na ko.”

Pagka 1995, Hunyo 25, gikan ko sa Bogo niadto kay nagprograma man ko sa radyo DYCM kada Martes sa gabii, nadisgrasya ko samtang nagsakay sa akong motor balik na unta dinhi sa siyudad.

Gidasmagan ko sa usa ka Prime Mover, kanang bitaw’ng dako nga sakyanan nga magguyod og taas kaayong trailer. Gilayan sa pangunahang ligid ang akong tuo nga paa human ko natumba sa gisakyan kong motor.

Didto kini mahitabo sa Sitio Bakhaw, Barangay Catmondaan, Catmon. Gi-blotter sa police station ang maong hitabo. Dakong milagro kay wa mabali ang akong kabukogan bisan og gilatayan sa ligid ang akong paa.

Igo ra nga nagisi ang gisul-ob ko nga karsones, naporma gud og “L” ang gisi. Ang karsones nga gisul-ob nako niadtong higayona, hangtud karon ako pa nga gitipigan ug gihimong handomanan sa milagro.

Nganong nakaingon ko nga gimilagrohan ko ni Santo Niño? Dihang gidam-agan na ko sa trak ug paingon na kanako ang ligid, misinggit ko nga “Santo Niño tabangi ko!”

Dayon, nabatyag nako nga ang ligid sa trak milatay sa akong paa, ug dayon napahunong didto sa unahan.

Ang nakakita gud wa makatoo nga wa mangabali ang akong kabukogan.

Daghan kaayo og mga pagtabang si Santo Niño kanako, dili na maihap, apan kadtong hitaboa maoy dili gyud nako makalimtan kay kon wa pa ang akong idolo, patay na ko.

Mao nga kamong mga kuwang pa og pagtoo ni Santo Niño, sunda ko ug himoa ninyo siya nga gabayan sa mga paningkamot sa kinabuhi. Viva Pit Senyor!