EDITORYAL — Nagsalig nalang sa ayuda

Gituki ug giestoryahan karon ang kabahin sa inisyatiba sa Department of Social Welfare and Development (DSWD) nga paghatag og dugang ayuda para sa mga mabdos nga ubos sa Pantawid Pamilyang Pilipino Program (4Ps).

Matud pa kining maong suporta paigo sa unang 1,000 ka adlaw gikan sa pagmabdos nga gitawag og First 1,000 Days (F1KD) program, para kuno ni isuporta sa mga kababayen-ang 4Ps sa panahong gikonsiderar nga critical stages sa pagpadako sa masuso gikan 0 hangtud 2-anyos.

Ang mga mabdos nga 4Ps hatagan og dugang P350 kada buwan o P13 kada adlaw sulod sa 1,000 ka adlaw ubos sa F1KD program.

Kung buot tan-awon, gamay ra gyud kun usa ra ka mabdos ang hisgutan, apan kun moabot na gani og minilyon ka mabdos, dako-dako gyud ni nga budget nga kinahanglang igahin.

Pundo nga pwede gamiton sa sama sab ka importanteng programa sa gobiyerno sama sa edukasyon, family planning, livelihood ug uban pa nga makahaw-as sa mga kabus.

Di gyud malikayan nga magdudang magsalig na hinuon kining mga 4Ps beneficiaries ug magpatuyang og pamabdos kay matag anak adunay ayuda ang gobiyerno.

Nakasiguro ba ang DSWD nga kining mga benepisaryo wala namakak kun gihatag ba gyud nila  ang tabang sa gobiyerno ngadto sa ilang mga anak? 

Duna bay nisusi ug ni-beripika sa mga requirements, giinterbyu ba gyud ang mga anak aning mga benepisaryo o ba kaha giadto gyud ang mga eskuylahan aning mga bata?

Kay dunay mga benepisaryo nga ang ilang mga anak atoa gipapuyo sa lain nga mao say nagpakaon, nagpaeskuyla ug nagbisti sa mga bata, ang ayuda para nila atoa lang sa inahan, wala masayod ani ang taga DSWD.

Sa mga Pilipinong wala ra magtagad anang mga panghitabo sa sud sa gobiyerno ug sa ilang mga lokalidad, wala sila makakita sa unsa gyud kadako ang problema sa ubos.

Kung duna man, nadungog ug nabasahan lang ilang kasayuran, wala gyud sila nakasuway ani nga sitwasyon sa tibuok nilang kinabuhi.

Walay dautan ang tumong sa DSWD, apan timbang-timbangon gyud unta kun para asa gamiton ang kada piso sa pundo niini, kun nakatabang ba gyud sa mga nagkinahanglan o nagpahimo hinuon  kanila nga mga tapulan.