Gihunong una sa COMELEC ang pagprinta sa 73 milyones nga official ballots alang sa eleksiyon sa Mayo 12 human moluwat ang Korte Suprema og temporary restraining order (TRO) nga nagpugong sa COMELEC pag-disqualify sa lima ka kandidato. Maingon nato nga usa kini ka loophole sa gahum sa COMELEC diin mahimo niini ang pag-disqualify sa usa ka kandidato bisan may katungod pa ang naulahi pag-apelar sa iyang kaso. Sama sa berdugo, ang COMELEC maoy judge ug executioner sa samang higayon. Matud pa sa akong higala, “Walay katungod ang COMELEC nga mohukom nga sad-an ang kandidato. Apan wala usab kini katungod nga mohukom nga inosente ang maong kandidato.” Madahaan!
Madelatar ang exemption
Mipasidaan si Cebu City Mayor Alvin Garcia nga kapin sa 50,000 ka benepisaryo sa socialized program sa dakbayan ang mahimong maapektohan kon dili aprobahan sa konseho ang resolusyon nga mangayo’g exemption sa COMELEC guidelines kabahin sa pagpagawas og kwarta panahon sa election period. May basehan ang kahingawa sa mayor apan katungdanan usab sa konseho ang pagsuta ug pagtuki sa detalya sa mga programa sa dakbayan. Mora’g mituyhakaw man ang ulo sa politika ni’ng kahimtanga. Mao kini giingon sa pagya-komedya nga, “Kon gusto, adunay pama-agi, apan kon dili gusto, adunay rason.” Saoonz!
Parehas ra nga polis
Nabalaka si Cebu City Mayor Alvin Garcia ni’ng kausaban sa liderato sa Cebu City Police Office (CCPO) diin gihulipan ni Col. Enrico Figueroa si Col. Antonieto Canete isip bag-ong OIC sa CCPO. Dugang pa ni Garcia nga ill-advised ang timing sa maong paghulip labi pa kay nagsugod na ang Sinulog Festival. May basehan ang kahingawa sa mayor tungod kay naumol na sa kanhi CCPO chief nga si Col. Canete ang mga security plan alang sa kasaulogan sa Sinulog 2025. Hinoon, husto usab ang komento sa akong amigo nga, “Duh, nganong maguol man nga parehas ra man na sila nga polis.” Pagkatoytoy!
May bayad na ang hangin
Mopatuman ang Starbucks og bag-ong polisiya nga kon ugaling mo-tambay ka sa ilang tindahan o ba kaha mogamit ka sa ang ilang restroom, kinahanglan nga mopalit ka usab sa ilang produkto. Gipatuman ang bag-ong polisiya aron mosaka ang halin sa ilang mga produkto. Ni’ng panahona gituohan nga hangin na lang ang libre. Apan matud pa sa akong amigo, “Dili tinuod nga libre ang hangin kay sa dihang mipalit siya og Piatos, mahal man kini bisan napuno lang sa hangin ang sulod sa putos niini.” Fezteleern!
Suliran sa basura
Nakakolekta ang Cebu City Department of Public Services (DPS) og 20 ka tonelada nga basura human gipahigayon ang 2025 Sinulog sa Dakbayan didto sa Cebu City Sport Center niadtong Dominggo, Enero 12, 2025. Balik-balik na kining maong suliran sa pagpataka og labay sa basura apan wala gayod kita mahinuklog kabahin ni’ng laksot nato nga kinaiya. Gipahinungod man unta nato sa Balaang Bata ang atong mga kalihokan sa Sinulog apan ang pagpataka’g labay sa basura dako’ng supak sa panultihon nga, “Cleanliness is next to Godliness.” Mao maan!