Pulos nagkabulingit
Ila sa mga Duterte ang tanang bentaha human sa rally sa Iglesia Ni Cristo (INC) niadtong Lunes, Enero 13:
Ang nasudnong protesta, nga gitambongan sa gibanabana sa kapolisan nga 1.8 milyones sa Quirino Grandstand ug sa nagkalainlaing bahin sa nasud, magamit nga ebidensiya sa pangangkon sa kalapad sa suporta para nila atubangan sa mga imbestigasyon sa Kongreso; ug
Wala maghisgot og impeachment si Speaker Martin Romualdez sa iyang pag-abli sa sesyon sa House of Representatives ug giklaro sa Malakanyang nga nagpabiling supak sa impeachment si Presidente Ferdinand Marcos Jr.
* * *
Taphaw ang mga alkontra sa administrasyon pagmatuod nga wala mahudlat sa puwersa sa mga Duterte:
Ang gipasalig ni Romualdez nga dugang imbestigasyon sa House wala makapapas, kon dili nakapasamot hinuon, sa pagkuwestiyon sa kapuslanan sa nahipos nilang mga ebidensiya kay gawas nga giyak-an ang impeachment wala pay kasong napasaka batok sa mga Duterte sa korte; ug
Ang pahibawo nga nahuman nang National Bureau of Investigation (NBI) pagsusi sa hulga ni Bise Presidente Sara Duterte pagpatay sa presidente, speaker ug first lady nagkahulogan nga wala pay klaro duna bay mapasakang kaso.
* * *
Giangkon ni House Secretary General Reginald Velasco nga dunay mga kongresista nga niawhag niya paghuwat sa ikaupat nga impeachment complaint nga pirmahan sa labing menos 103 ka mga kongresista (nga maoy 1/3 sa 310 ka sakop sa House) aron diretso nang masang-at ngadto sa Senado.
Gipahibawo ni Velasco nga isumiter na niyang tanang impeachment complaints ngadto sa upisina ni Romualdez sa Huwebes sunod semana. Ang kapakyas pagkolekta sa mga pirma nagmatuod nga naghuwat pang mga kongresista sa sugo ni Romualdez.
* * *
Ang kalig-on sa mga ebidensiya nga nahipos sa mga kongresista sa posibleng pagbolsa ni Duterte sa iyang confidential funds igo nang sukaranan sa impeachment. Kon ganahan pang administrasyon, sa niaging buwan ra unta na-impeach si Duterte.
Pero dili limpiyo ang mga kamot nilang Marcos Jr. ug Romualdez. Gipasanginlan sab og mas dakong kawat sa mga budget, apil na sa binilyon ka pesos nga confidential ug intelligence funds, sa 2023, 2024 ug 2025. Maong mora silang bulingit nga kaldero. Nga managana sa pagpanaway sa kaitom sa ilang gikabangga nga takuri.
* * *
- Latest
