Mas hayop pa kay sa bitin

Aniay pamahayag-bulgar ni Baguio City Mayor Benjamin Magalong kon giunsa sa kontrobersiyang House Speaker Martin Romualdez ang salapi sa kaban sa nasolud, diin matod pa ni Vice President Sara ‘Inday’ Z. Duterte, maoy tigkontrol sa ipanghatag nga pundo ngadto sa kada kongresista-senador alang sa ilang mga proyekto nga wala pa makita sanglit anaa pa man kini sa ilang hunahuna. Sa ato pa, pulos ra drawing:

“Everytime na sasama ka sa sortie ni speaker (Romualdez), every congressman gets 7 million na AICS or ACAP, 7 million na MAIP and 7 million na TUPAD, that’s about 21 million.

Kon nakaapat ka ba naman na sortie then 21 is times four, is eighty four million pesos.”

Bida, no? Grabe kagalante! Lupig pay dinagkong premyo sa maka-jackpot sa slot machine, diin kon unsay nakatatak sa screen mao ra gyoy madawat sa makadaog.

Pero sa pamaagi ni Martin, diin mokuyog lang mga kongresista ngadto sa mga dapit aron siya magpahumot sa katawhan gamit ang kuwartang pinatud-ag singot-dugo-luha sa mga magbubuhis, kutob sa mouban makadawat dayog minilyong suborno. Ug kinsa bang kongresistahang huyang ang dili matental?          

Dinhi pa lang, mahimo nang kasohan si Martin og ‘bribery’. Kaklaro uroyng gibrayban niya ang mga kongresista?

Apan kinsa bay moimbestigar nga nakuptan man niya halos tanang magbabalaod?

Hinungdan, sa privilege speech ni Representative Rodante Marcoleta sa miaging Enero 13, 2025 INC Peaceful Rally, atubangan sa gibanabanang moabot og 3M kaping nanambong, kang kansang gidaghanon misuyla pa sa dakong hawanan sa Qurino Grandstand, Manila, gitirahan niya taman sa ginhawa ang Quad Committee (Quadcom) sa Kongreso, tungod kay silang tanan nagpahigot sa yawan-ong salapi ug nahimong mga mangtas itoy ni Martin, kinsa wala gyoy alamag sa pagpalambo sa nasod. Kondili, kurakot ray nahibaw-an.

Ingon niini kagutom sa salapi-gahom-ambisyon si Martin. Mas arang-arang pa ang bitin kay kon busog na, dili na manukob. Pero si Martin, bisag miburot na sa pagpangawkaw, padayon gihapon pagpangitag kawkawanon.

Unya, okay ra ba kitang magtan-aw niining maka-bankrupt niyang gibuhat? Ang pagkahiusa ra gyod natong pro-good governance citizen ang makasalbar sa atong nasod nga gisigehan nag ukit sa mga anay. 

Ug anha magsugod sa atong kaugalingon.