Hinay kaayo ang internet

Dunay awhag ang Cebu City Council ngadto sa tagdumala og mga telecommunications companies, sama sa Globe, Smart, PLDT ug Dito nga siguroon unta nila nga kusog ang ilang internet signal.

Apan sigurado ko nga ang awhag ni Cebu City Councilor Jaypee Labella lisud mahatagan og katumanan. Pila na gyud ka mga tuig nga napanid-an nako nga mosamot kahinay ang internet signal panahon nga magkaduol na ang Piyesta Senyor.

Kini lang ako, postpaid man gyud ang akong plan apan “kamang” gyud ang internet signal, samot na karong Sinulog Grand Parade nga pwerteng daghana nga mogamit sa internet.

Unta, himoan kini og lakang sa kadagkoan sa Cebu City government pinaagi sa pagpatawag sa kadagkoan sa mga telcos, aron sila pangutan-on kon kaya ba nila nga mapakusgan ang internet signal.

Angay’ng pasalamatan nato ang kadagkoan sa siyudad nga gipangulohan ni Mayor Raymond Alvin Garcia kay wa sila mopabor nga putlon ang internet signal.

Ambot kaha kon dili ma gyud mausab ang ilang baruganan kay pwerteng lisura kon way internet signal atol sa fluvial procession, solemn procession sa Santo Niño ug sa Sinulog Grand Parade.

* * *     

Ang kapolisan, mga tanod ug ubang peace keeping volunteers, gipahimangnoan sila nga dili mamauli human sa Sinulog Grand Parade kay ang ilang serbisyo gikinahanglan pa kaayo inigka gabii.

Sila si Cebu City Councilor Joel Garganera ug Philip Zafra mipasabot nga sagad anha na sa gabii mamugna ang kagubot, kay duna nay mga hubog, kon dili masanta ang mga tawo nga maghimo og mga party, ug mag-inom diha sa karsada.

Di man gyud kalikayan nga dunay mga hubog sa mga tawo nga mosaksi sa Sinulog Grand Parade kay gitugot man ang pagpamaligya og mga beer ug ubang matang sa ilimnong makahubog lapas sa 300 metros ang gilay-on gikan sa parade route.

Kamong mga polis, badlonga ug kon dili mopatuo, dakpa ang mga tawo nga mag-inom og mga makahubog nga ilimnon diha sa rota sa prosesyon unya sa Enero 18, ug sa grand parade unya sa Enero 19.

Si Mayor Raymond miisyu na og Executive Order kabahin niining pagdili sa pagbaligya, pag-inom ug ilimnong makahubog diha sa rota sa prosesyon ug sa grand parade.

Mao nga kamong mga polis ug mga tanod, gikinahanglan gyud nga anaa mo gikan sa adlaw hangtud sa gabii. Nabantayan man gud nga sa nangaging katuigan, inigka gabii, mangawala na ang mga polis ug tanod.

Gipaabot ra ba nga kay gibalik na man sa karaang rota ang Sinulog Grand Parade, pwerteng daghana gyud sa mga tawo nga modugok niini aron mosaksi sa mga dancing contingents.