EDITORYAL — Gaba o tungod sa Climate Change?

Naharos og kaugdaw ang kadaghanan sa mga kabalayan sa Los Angeles, California didto sa Amerika nga niresulta na sa kamatayon sa 16 ka mga nagpuyo didto ug nasukod ang katakos sa mga nagkalain-laing kabomberohan didto.

Ang maong dakong sunog, milamoy sa mga mansiyon sa mga sikat nga mga artista sa Hollywood nga milyones dolyares ang matag usa.

Ang grabeng kainit sa panahon didto ug ang kusog nga hangin gikan sa dagat Pasipiko maoy nakapapaspas sa pagkuyanap sa kalayo diha sa ilang komunidad.

Gani, hasta ang silingan nilang nasud nga Canada nagpadala na og espesyal nga mga abyon aron pagtabang pagbubo og tubig sa sunog samtang ang mga kabomberohan sa mga silingang states niresponde na sab aron makatabang.

Gibanabanang sobra na sa 12,000 ka mga estraktura, apil na niini ang mga mahalong mansiyon ug mga buildings ang naugdaw.

Ang maong sunog nikatap dili lang didto sa maong lugar kondili hasta pud sa social media ug dunay kaugalingong mga intepretasyon ang mga netizens niini.

Dunay mga nag-ingon nga tungod kini kay ang mga nagpuyo sa maong mga mansiyon nakalimot na sa Ginoo ug sila mga makasasala kay mas gipili nila ang kalibutanong katagbawan inay ilang espirituhanong pakig-relasyon ngadto sa Magbubuhat.

Mao sab ni ang nakaapan sa mga tawo karon, imbes nga maluoy sa gidangatan sa mga taga didto mas ganahan pa silang manaway ug motungo sa mga nasunogan, tungod ba kay sila mga adunahan?

Kun daghang mga artista ug mga adunahan nga nawad-an og panimalay sa maong hitabo, samot na ang mga ordinaryo ug mga kabus nga mga nagpuyo didto.

Apan kun siyensiya maoy basihan, naa tanang mga ebidensiya ug mga pagtuon nga epekto kini sa Climate Change o kanang pag-usab na karon dagan sa panahon.

Sobra na ang kainit sa kalibotan tungod sa polusyon nga binuhatan sa tawo.  Magsilbi unta kining leksyon sa tanan, dili lang sa Amerika kondili tibuok gyud kalibotan.

Dili tanang mga nasud adunay kapabilidad ug kaadunahan sama sa Amerika, ang nahitabo sa ila karon dili layo nga mahitabo sab sa ubang mga nasud, pobre man o adunahan.