Kong ikaw ang papilion, ang public servant nga dili halos igkita sa iyang buhatan o kanang anaa ra kanunay magyampungad sa opisina 24 oras? Kini nunot usab sa kasikas nga gilambigitan sa pangulo sa Cebu City Transportation Office Raquel Arce nga mitumaw sa usa ka social media post nga anaa na magpuyo sa buhatan sa CCTO diha sa SRP nga nakaani og managlahing reaksyon.
Apan dali kining gipasabot ni Arce nga anha ra siya magpundo sa iyang office kong adunay dagkong mga kalihokan sa dakbayan sama sa Pasko ug uban pa nga kinahanglanon usab kaayo ang iyang pagtubag sa mga panghitabo nga adunay kalambigitan sa trapiko sa dakbayan.
Sa tinuod lang aduna man kiniy balay si Arce nga desente ug hamugaway nga iyang kapahuwayan ug nganong magsakritpisyo man siya sa iyang opisina? Dili sa pagpanaway, ang CCTO office dili man gyud haum nga puy-an kong comfort lang ang hisgotan, dili man comfortable.
In fairness aning Raquel Arce, hands-on kaayo ni siya sa trabaho. Bisan unsa nga departamento nga iyang huptan, mangunay gyud ni sa pagtrabaho.
Kadtong sa market hangtud na sa PROBE, siya man gyud ang mangunay ug mao usab kini ang iyang gihimo sa CCTO.
Daghan ang nisaka ang kilay ilabi na dihang bag-o pa siya nga natudlo nga mangulo sa CCTO kay lagi alang sa uban walay kabangkaagan. Pero naningkamot usab si Arce nga makahimo sa tahas nga gisangon kaniya. Gani kapila ko na ni siya nalabyan samtang ang drive ko padung pauli siya mismo ang nangunay sa pag man sa trapiko nga nakabistida pa ilabi na niadtong panahon sa Pasko.
Dinhi ta sa isyu sa giingong 24/7 nga pagbuyo sa CCTO office. Dili man siguro kini dautan kay bisan unsang orasa anaa siya nga makaserbisyo, makamando sa iyang mga sakop sa mga angayan nga buhaton. Ang sayop lang niya nga nasobrahan ra si Arce sa pagka-devoted sa iyang trabaho nga maoy naingnan nga gihimoan siya og isyu.
Bati lang siguro kong mag-24/7 siya unya mo-claim og overtime nga hilabihang dakoa, pero wala man seguro kay department head man siya. Kanang isyu sa tubig, suga ug aircon gamay ra man na na dili maka compensate sa kahago nga iyang gihimo sa dakbayan.
Ang angayan sawayon kadtong mga kawani sa gobiyerno nga wala pirme sa ilang opisina ug dili gyud madakpan kay busy pirme nga wala ra gyuy gika bisihan apan ma-busy lang kong mokobra sa sweldo. Kini si Raquel Arce dili homeless ug naa sad ni siyay pamilya. Isip pamilyadong tawo komportable gyud ka kay naa ka kanunay sa imong panimalay. Mas nindot pa man seguro ang balay ani niya itandi sa iyang office.
Hinuon anad naman ni si Raquel bisan asa ilabay. Naka-survive man gani ni siya sa una dihang gilabay ug gipabantay sa sementeryo.
Tagam kay sobra ka dedicated sa trabaho, ikaw pa ang nasawayan Raquel Arce uli nalang didto sa inyong balay ug didto ka mopahuway sa balay nimo nga hamugaway.