Madato man o pobre, duna gyuy tsansang masakit. Usa niini kaning sakit sa kidneys nga matud pa sa mga doktor kasagaran epekto sa gipangkaon ug gipang-inom sa tawo sukad pa sa ilang pagkabata, pasalamat lang kay duna nay naimbentong ekipo aron makaalibyo sa pasyente.
Ang dialysis usa ka medical procedure nga diin ang dugo sa tawo ipagawas aron salaon sa dialysis machine una ibalik sa lawas.
Sa laktod, limpyohan ang dugo gikan sa mga toxin nga nakuha gikan sa mga gipangkaon kun ang kidneys naguba na tungod sa pagpabaya sa lawas ug walay disiplina sa pagkaon ug sa kaugalingon.
Apan sa duha, ang dunay paglaum nga masumpayan pa ang kinabuhi mao ang mga adunahan kay duna man silay ikabayad sa dialysis sessions nga dili moubos og P2,500 , unya kaduha o katulo ka higayon kada semana, depende sa rekomendasyon sa mga doktor.
Gani dako pa ang tsansa nga magpa kidney transplant sila kung kaya sa ilang bulsa ug dunay donor nga haom para sa ilang pasyente.
Sa mga pobre nga deperensiyado na og kidneys, ubos kaayo ang tsansang makasugakod ug malugwayan ang kinabuhi.
Maglisud man gani og kuha’g P500 kada adlaw nga kita kay kuhaan pa kini sa ubang gastos sa kaugalingon, sa pamilya ug sa balay. Asa man pangitaon sa mga kabus ang P2,500 nga bayad sa dialysis?
Samut nang dili nalang mangandoy nga maka kidney transplant kay bisan duna pay libreng donors, milyones ka pesos man sab ang mabayran sa procedure, sa mga doktor, sa mga tambal, rehabilitasyon ug maintenance pa gyud.
Bugtong paglaum lang gyud sa mga kabus kining libreng dialysis centers, ug walay laing makahatag ani nga pasilidad mao ra gyud ang gobiyerno o ba kaha ang mga local government units para sa ilang mga konstituwente.
Dunay coverage sa dialysis ang PhilHealth apan ang kakuwang sa gidaghanon sa mga dialysis centers sa matag lokalidad, taas kaayo ang linya ug ang uban dili pa gani maserbisyohan sa hustong gidaghanon sa session kada semana unya duna pay uban nga bayranan.
Kani unta himuong prayoridad sa mga mokandidato karong mid-term elections, kanang mga panaad nga praktikal ug gikinahanglan dili kanang puro lang paisogay ug bulatik.