Ang ebanghelyo nag-asoy sa mga panghitabo sa dihang gibunyagan ang atong Ginoo didto sa Suba sa Jordan ni Juan. Adunay tingog nga nadungog nga nag-ingon: “Kini ang pinalangga kong Anak” ingon man ang salampati nga nitugdon kang Jesus nga gibunyagan timaan sa Diosnong pag-uyon. Si Juan Magbubunyag bisan pa man kun siya ang nibunyag ang adunay dakong kasayuran sa kamatuoran nga ang anaa sa iyang atubangan mao siya nga dugay na gipaabot. Dinhi atong natataw nga si Juan nius-os aron si Jesus motaas. Unsa ka mapapaubsanon nga precursor si Juan Magbubunyag.
Kasinatian
Sa dihang kita gibunyagan ang Dios niangkon nato nga iyang kaugalingon. Iya kitang gipatikan sa tulo ka mga kinaiya sa iyang anak nga si Jesus. Kita nahimong parianong katawhan, harianong lungsod, mga propeta ning atong kapanahonan karon. Gitawag kita isip mga binunyagan diha sa kinabuhi nga maampoon, maalagaron ug mga maisogong magsasangyaw sa kamatuoran ug sa mensahe nga makapahimo kanatong kahimanan sa kaayo ug kadasig. Kining tanan magasugod gyud sa tagsa tagsa nato ka mga kaugalingon.
Lihok
Sauloga ang imong pagka binunyagan. Mas maayo nga imong susihon ang petsa ug tuig nga ikaw gibunyagan. Kinsa ang imong mga kinugos ug pasalamati ang Dios gumikan niini.
Pangamuyo
Tanan: Ginoo salamat sa bunyag nga akong nadawat. Unta akong mapuy-an kining maong bunyag sa akong inadlaw adlaw nga pagkinabuhi. Pinaagi ni Kristo among Ginoo. Amen.