Ug naka-survive ko

Enero 8, 2025. Wala ko makahigayon pagtagik og materyal alang ning atong lindog tungod kay halos tibuok adlaw nagamit sa follow-up care nga gi-schedule by appointment sa ikaduha nakong co-attending doctor nga neurologist.

Tiaw bay, wala pay alas 9:00 sa buntag didto na mi sa ilang clinic nga abli Monday-Friday, 8 a.m.-5 p.m. by appointment. Nagtuo ko, nga i-prioritize mi sanglit sayo man kong mi-book og appointment. Apan naunsa ba, nga ika-number 11 na man diay ko sa ilang listahan. Pastilan, gi-wheelchair pa ra ba ko ug wala na magdalag oxygen kay abig dali na lang ang patsek-ap.

Hinuon, nagpraktis na ko sa amoa nga dili na mag-oxygen concentrator. Pero dili kasaligan kay moubos man gihapon sa 90 akong pagginhawa. Usahay, mous-os gani ngadto sa 80 paubos. Maong namarayeg ko sa secretary kon puwede ba kong mauna tungod sa kadelikado sa mao nakong kahimtang. Pero iya ra ko niyang gipahiyoman ug gibalibaran.

Diay, bisag ang pasyente may appointment na, first come-first serve basis diay ilang patakaran ug ulahi na kong nasayod niini.

Dinhi ko mibelib sa secretary. Kay bisan sa kinasingkasing hangyo niining masakiton, maoy mipatigbabaw iyang prinsipyo – ang kawalay kaluoy sa pagsabot! Resulta?

Napugos kog barog-lakaw biya sa wheelchair, migawas sa entrance-exit door sa maong 8th floor parking area ug atubangan sa upaw nang mountain view, mihanggap kog lab-as nga hangin ug giaplay ang depth inhale-exhale breathing gikan sa buntag hangtod hapit nang alas 2:00 sa hapon, diin mao pay pag-abot sa akong turno.

Hinuon, nagdala kog oximeter aron i-monitor akong pagginhawa, diin oras nga moubos ngadto sa 90, unya mo-us-os pa sa 80, kinahanglang paabton ko kinig 90 pataas.

Thrilling kaayo. Kay na-low bat ang oximeter. Maglisod na kog monitor. Busa, unsay kataposan nakong paagi?

Gisangpit-gisalig ko sa atong Ginoo ang tanan, nangaliyupo: “Lord, ikaw nay bahala nako!” Ug naka-survive-nakalahutay gyod ko!

Mga suking The Freeman/ Banat News readers, sorry kaayo kon hasta personal kong kasinatian gipaambit ko sa tanan, ilabi na sa sama niadtong doctors’ secretary, kinsa bisag nagpakiluoy na ang talandugong pasyente, ang first-come-first-serve basis nga prinsiipyo mao gyoy iyang gipatigbabaw.

Unta, makat-on sila sa pagka-flexible diha sa ilang pagpangalagad panahon sa emerhensiya!