Buhi pero niwang

Segun sa fourth quarter survey sa Social Weather Station (SWS), misaka ang gidaghanon sa mga kabos nga Pilipino bisan pa man kon gipaubsan na nila ang ilang living standard pinaagi sa pagkunhod sa budget sa matag pamilya alang sa galastohan sa balay.  Kining survey sa SWS, nagmatuod nga dinhi sa Pilipinas ang pobre mosamot ka pobre ug ang mga dato mosamot ka dato.    Haum ang tubag sa akong silingan nga sa dihang gipangumusta sa iyang kahimtang,  subo siya’ng mitubag nga, “Ok ra man.  Buhi lage pero niwang.”  Fezteleern!

Andam mo-ula sa kinabuhi

Tungod sa resulta sa survey sa SWS kabahin sa pagsaka sa gidaghanon sa mga kabos nga Pilipino, nanawagan ang usa ka kongresista sa administrasyon kabahin sa kapakyas niini sa pagsulbad sa maong suliran sa kakabos sa katawhan. Adunay lain usab nga kongresista nga miingon nga ang survey maka-aghat sa mga magbabalaod nga motrabaho pag-ayo.  Mga matam-is nga pulong ang gisulti sa mga magbabalaod. Apan dili kini maka-alibyo sa kahimtang sa katawhan.  Tinuod gayod ang panultihon nga, “Ang politiko maoy tawo nga andam nga mo-ula sa kinabuhi sa katawhan alang sa nasud.”  Pagkatoytoy!

Botaran ang tig-lawog

Namahayag si AFP Chief Gen. Romeo Brawner Jr., nga ang paglusad og coup d’etat batok sa Marcos administration dili sulbad sa mga suliran kabahin sa societal ug political issues sa nasud.  Hinunoa, gidasig niya ang katawhan sa pagbotar sa mga hustong lider karong eleksyon sa Mayo 2025 nga ilang gituohan nga makasulbad sa mga suliran sa nasud.  Motherhood statements lang pamahayag ni Brawner.  Sayod kita sa kahuyang sa katawhan batok sa vote-buying sa panahon sa piniliay.  Haum ang panultihon nga, “Kon makabotar pa ang mga baboy, ang tawo nga magbitbit sa lawog mao gayod ang ilang pilion bisan sa kadaghan na sa iyang gipang-ihaw nga baboy.”  Muleeng!

Tagsa’g dala og imahe

Matud pa sa tigpamaba sa Cebu City Police Office nga si Police Lt. Col. Maria Theresa Macatangay, malinawon ug hapsay ang pagpahigayon sa Walk with Jesus procession bisan sa kadaghan sa mga deboto nga misalmot niini.  Sukwahi kini sa prosesyon sa Hesus Nazareno didto sa kaulohan diin daghan ang maangol tungod sa kakulang sa disiplina sa mga deboto.  Agi’g panahom, miingon ang ako’ng amigo nga, “Dili samok diri sa Cebu kay ang mga deboto nagdala man sa ilang kaugalingon nga imahe sa Sto Nino samtang sa kaulohan, usa ra man ang ilang imahe sa Nazareno.”  Madahaan!

Kuhaan ang wala

Gikwestiyon ni Konsehal Jocelyn Pesquera ang giaprobahan sa Cebu City Council nga P472,000 nga budget isip ayuda sa Cebu Marathon tungod kay mokita man og gibana-bana nga P17 milyones ang mga organizer sa maong marathon event. May punto sa Konsehal Pesquera.  Ngano nga gamiton man ang pundo sa kagamhanan alang sa pribadong kalihokan nga mokita og minilyon?  Kon imong tabangan ang wala magkinahanglan, morag adunay bikil sa imong panghunahuna.  Angayan tamdan ang panultihon nga, “Kon mohatag ka’g hinabang, angayan unahon pag-lantaw ang panginahanglan sa mga kabos.”  Mao maan!