Kuyaw na ni da!

Dili gyud makahinan-aw lang ang kadagkoan sa United States of America sa pagpangabuso sa China kanatong mga Filipino. Wa malilong kanila ang pag-abuso sa mga Insik kanato.

Nasayran sa kadagkoan sa United States nga ang China nagpadala sa gitawag nila og “Monster Ship” sa Chinese Coast Guard didto sa dapit sa West Philippine Sea.

Paminaw ko, nagpangagot na ang ngipon sa mga opisyal sa United States sa gihimo sa China kanatong mga Filipino, mao nga gipadala nila ang usa sa dako nilang barkong igugubat duol sa West Philippine Sea.

Ang USS Carl Vinson nagpahigayon na og routine operations sa lapad nga kadagatan nga dili layo sa gikabangian sa Pilipinas ug China.

Ang maong higanteng barko sa US Navy makargahan og 90 ka fighter planes, ug gisakyan kini og mga 5,000 ka Navy, ug mga US Air Force nga nag-man sa fighter planes.

Wa pay reaksiyon ang China kabahin niining pagpadala sa United States sa usa niini ka higanteng barkong igugubat ngadto sa West Philippine Sea.

Gawas sa United States, duna pay ubang mga dagkong nasud nga nagpakahilom lang apan misimpatiya sila sa Pilipinas ug tingali andam silang moalalay kon dunay panginahanglan.

Awhag nako sa mga dagkong opisyal sa mga Insik nga ania sa Pilipinas nga kon may kontak kamo sa Chinese government, awhaga ninyo sila nga dili na mangabuso sa Pilipinas.

Ang dapit nga giangkon sa China nga sila’y tag-iya, o kabahin sa ilang teritoryo, nahimutang kapin sa 900 milyas gikan sa ilang nasud, ug duol kaayo kini sa Palawan.

Nganong mangangkon man gyud sila? Abi kay ang maong lapad kaayong kadagatan gihinganlan man kaniadto og South China Sea diha sa mga mapa sa kalibutan?

Nasayod ko nga gamhanan kaayo ang China kon armas nga panggubat ang hisgotan, apan dili usa nila kalimtan nga gamhanan usab ang United States nga andam molaban sa Pilipinas.

Makaako ba kaha silang magtan-aw nga mahitabo ang kagubot tungod lang sa tinguha nila nga ilogon ang dapit diha sa West Philippine Sea nga nahukman na nga sakop kini sa Pilipinas?

Wa nila hunahunaa nga pagka daghan sa mga kadugo nilang Insik nga ania manimuyo sa Pilipinas ug posibleng maamong kon mahitabo nga magkagubat tungod lang sa ilang kahakog.

Si Presidente Bongbong Marcos pabiling nagpakahilom lang sa pagpangabuso sa China kanatong mga Filipino. Tingali, maoy tambag kaniya sa iyang mga advisers nga magkalma lang usa.

Ang National Security Council mohatag man gyud na og tambag sa presidente, kay kon mohimo si Presidente Bongbong og dihadiha nga reaksyon, unya momando nga pasukolon ang atong mga Coast Guard, sigurado man gyud nga magkagubot.

Tan-aw nako, dili pagtinalawan ang gihimo ni Presidente Bongbong, kon dili gitan-aw niya ang dakong kadaot kon mahitabo ang gubat.