Karong Sinulog, gipaabot nga modagsa gyud ang mga tawo gikan sa nagkadaiyang mga dapit dinhi sa nasud ug ingon man ang gikan sa laing nasud, langyaw man o mga balikbayan.
Makalingaw gyud ang Sinulog tungod sa kasadya niini kun itandi sa ubang mga festivals, mao nga dugokon gyud kini og mga tawo. Apil na ang mga artista ug sigurado, mga politiko pud.
Apan karon nga nagsingabot ang eleksyon, siguradong magbaha pud unya ang mga politiko nga mangari, dili tungod sa selebrasyon o dili tungod sa ilang panaad, kondili magpa epal sa mga tawo.
Dili man gyud kalikayan, ug dili man sab sila angay did-an sa pag-anhi kay mogawas nga bati og kinaiya ang mga Sugbuanon kun bawalan sila pag-anhi.
Ang pagdagsa sa mga inilang tawo makatabang baya og dako aron mailhan pa og maayo ang Sugbu ilabi na ang Pista Senyor ug ang Sinulog.
Basta dili lang magkayagaw ang mga tawo ug dili moresulta sa stampede ang ilang pagbutho taliwala sa daghang mga tawo, wala man tingali problema.
Karong Sinulog imbitado si Presidente Ferdinand Marcos Jr., sigurado nga dili lang siya maoy mangabot tungod kay magpanon man gyud kini pirme kauban sa ubang mga opisyales sa nasud.
Tungod kay dako man kini nga kalihokan ug selebrasyon ug gipaabot nga moabot og milyon ka tawo ang mosaksi, sigurado sab nga duna say mga opisyales nga dili niya kauban sa panon ang maiyahay sab og himamat sa mga tawo.
Mao kini ang usa unya sa mga risgo sa seguridad, ilabi na kun kining mga tawhana mga prominente tungod kay tapuk-an man gyud sigurado sa mga tawo ug maproblema ang mga magbalantay kay mabiyaan na hinuon ang ubang pwesto.
Busa, kamo dihang mga inila ug popular nga mga bisita, kun duna unta silay plano nga moanhi, mas maayong magpahibalo silang daan sa mga lokal nga otoridad aron mapreparahan ang ilang seguridad, dili maghimo og kaguliyang diha sa tawo.
Angay sab silang morespeto sa selebrasyon kay dili kini para nila kondili para sa Balaang Bata.