Nagkadaghang mga timaan nga mahinayon ang House of Representatives pag-impeach ni Bise Presidente Sara Duterte inig balik sa sesyon sa Lunes, Enero 13. Nga maoy kataposang adlaw sa lugway sa 1987 Constitution pag-atiman sa unang impeachment complaint nga gipasaka sa Disyembre 2 sa niaging tuig.
Kon padayong mangiyugpos ang liderato sa House, malapas ang tagal sa paglihok ni Speaker Martin Romualdez sa impeachment complaint sulod sa 10 ka session days human napasaka. Gawas nga dili ganahang bugalbugalan nga nikakak ni Duterte dili mosugot ang House nga pasanginlang nisukwahi sa konstitusyon.
* * *
Usahon ba ni House Secretary General Reginald Velasco ang tulo ka impeachment complaints una isang-at sa upisina ni Romualdez? Igo ba lang ipasa ni Romualdez ngadto sa House Justice Committee nga dunay ka 60 ka session days paghimo og public hearings sa dili pa morekomendar sa plenaryo sa pag-aprobar o pagbasura sa impeachment? Mapapas ang tanang kalibog kon mahinayon ang gikataho nga ikaupat nga impeachment complaint nga pirmahan sa labing menos 103 ka kongresista, nga mao ra ang gikinahanglan aron diretsong mapasaka ang articles of impeachment ngadto sa Senado?
* * *
Kon ma-impeach si Duterte karong Lunes, labing sipa nga tubag sa administrasyon ni Presidente Ferdinand Marcos Jr. sa kadagkoan sa Iglesia ni Cristo (INC) nga motapok sa samang adlaw sa minilyon nila ka sakop pagsupak sa impeachment.Nga angay lang. Kay pulos pakyas ang mga kawsa nag-unang duha ka nasudnong protesta sa INC: Pag-awhag nga mabalik sa Malakanyang si kanhi Presidente Joseph Estrada niadtong 2001 ug pagbabag sa impeachment ni anhing Chief Justice Renato Corona niadtong 2014.
* * *
Mahimong dili sama kadako sa tapok sa INC ang mga protesta sa mga grupong pabor sa impeachment nga himuon sab karong buwana. Pero ang pagdaghan sa mga uyon nga palagputon si Duterte ug ang paghiyos sa mga nagsuporta niya, segun sa survey sa Social Weather Stations (SWS) sa niaging buwan, makakumbinser sa Malakanyang paglihok na. Kon masugdan ang impeachment trial karong Pebrero, masumpayan ang labing makasaysayanon nga politikanhong kalihokan sa unang duha ka buwan sa tuig—ang First Quarter Storm dayong deklarar sa martial law sa 1972, Edsa Uno sa 1986 ug Edsa Dos sa 2001. -- leolastimosa@gmail.com