Gikawat nga e-bike gibiyaan taliwala sa karsada sa Tabunok

CEBU, Philippines — Gibilin diha sa tunga sa karsada sa Barangay Tabunok, Dakbayan sa Talisay ang e-bike nga gikawat nga gimaneho sa menor de edad niadtong Enero 1 niining tuiga.

Gikataho nga gikan pa kini sa Dakbayan sa Naga ug gidala diha sa Dakbayan sa Talisay.

Nasayran nga ang maong e-bike gi-parking kini diha sa kilid sa karsada sa North Poblacion, Dakbayan sa Naga ug gikuha kini sa kawatan.

Ang nahisgutang e-bike gibiyaan kini sa menor de edad human gisita sa sakop sa City of Talisay-Traffic Operation Development and Authority (CT-TODA) gumikan sa kalapasan sa lagda sa karsada.

Ang tag-iya sa e-bike nagpakisusi hangtud nga naabot kini sa buhatan sa CT-TODA.

Nakapresentar ang tag-iya og mga dokumento sa pagmatuod nga siya ang tag-iya sa e-bike ug gi-release kini ni Jonathan Tumulak, pangulo sa CT-TODA ngadto sa tag-iya. BDB BANAT NEWS