EDITORYAL - Paburot sa presyo

Nidagsa na dinhi sa Cebu City dili lang ang mga dumuduong kondili apil ang mga magpapatigayon tungod sa umaabot nga dakong selebrasyon karong buwana, ang Pista Senyor ug Sinulog 2025.

Gani makita na karon diha sa karaang dalan Colon kining Night Market nga diin gatosan ka mga vendors ang nagbaligya og klase-klaseng produkto gikan sa sinina, gadgets, sapatos, mga fashion accessories, mga pagkaon ug daghan pang uban.

Gawas sa dalan Colon, naa pay daghang mga nangsulpot nga mga lamesa-lamesa nga nagbaligya sab og bisan unsa ug kaning mga kariton nga dunay mga baligyang Sinulog souvenirs ug uban pa.

Samtang tuod og gipunsisokan kini karon sa daghang mga tawo, pagkatinuod dili tanang nangadto ang naengganyong mamalit sa ilang mauyonan tungod sa presyo.

Wala na karon ang kaniadto gitawag nga mga “barteran” nga diin barato gyud halos tanang baligya, bisan tuod kwarta ug dili produkto ang ibayad sa mauyonang butang.

Dili “budget friendly”ang mga presyo kay grabe kamahal ilabi na nga ang uban mahimo rang mapalit sa regular nga mga tindahan nga naa lang sab diha sa duol sa ilang mga pwesto.

Tinuod negosyo man kini ug inahanglan gyud hinuon nila nga makaginansiya kay unsa may kapuslanan nga maninda sila nga dili sila mokita? Apan dili sab unta palabihan kamahal.

Laing nabantayan nga nasobrahan kamahal ang presyo mao ang mga pagkaon nga wala may espesyal sa ilang baligya.

Dili anang mga regular nga mga kan-anan o fastfood chains kondili kining mga namaligya diha sa Colon Night Market ug kanang mga food parks nga pinatuyo butang alang makabaligya ang mga gustong maninda tungod sa okasyon. Pagkatinuod, kaning mangaon sa mga ingon niini dili ang pagkaon o gilamion sa baligyang pagkaon gyud maoy ilang tuyo.

Ang ambiance sa palibot tungod okasyon kauban sa ilang mga higala ang rason, ilabi na ang uban magtampo-tampo ra sa ilang kwarta.

Kun ingon ani man lang mga mahal ang mga produkto, maayo pang adto nalang mamalit sa mas baratong mga tindahan ini og adlawan ug mangaon sa mga saktong kan-anan.