Vlogger attack sa Sinulog

Mahibalik na gyud sa naandan nga venue ang Sinulog Grand Parade sa sentro nga bahin sa syudad sa Sugbo human sa duha ka tuig nga pagbalhin niini didto sa South Road Properties kon SRP.

Mabibo na usab kining mga karsada nga maagian sa mga contingents labaw na ang mga negosyo nga naa sa kilid nga nakasinati kaniadto og huwaw sa kamingaw dihang gibalhin sa SRP ang kalihokan.

Gipaneguro sa Sinulog Foundation Inc., ug sa LGU apil na ang kapolisan nga hapsay ra unya ang dakong kalihokan nga dugokon sa bagang duot sa katawhan kay mao man kini ang tinuig nga giatangan apil na sa mga turista.

Mas daghan ang masaksihan kay sa dancing contingents lang daan aduna nay 42 ang kompirmadong mosalmot gikan sa nagkadaiyang dapit sa nasud. Gani sa unang higayon dunay gikan sa Luzon nga tulo ka contingents, so, Luzon Visayas ug Mindanao na ang representation sa mga participants.

Wala pay labot ang mga higante, floats ug uban pa. Imaginon nato kon unsa ka daghan ang participants ug unsa pud kaha ning orasa nahuman. Hinoon sugdan kuno dayon human sa opening mass ang cultural presentation ug posibleng maabtan og tungang gabii, dili ra makaadlawonan.

Taliwala sa ka bongga nga pagbalik sa Sinulog sa pusod sa syudad, mapaigo kaha ang daghang mga tawo sa mga rota nga agian? Lahi na baya ang sitwasyon karon itandi kaniadto. Gidumong naman gani to ang Sinulog sa lalawigan sa niaging tuig, kini pa nga nga main event na gyud.

Nabalaka ko sa posibleng stampede simbako lang tungod sa kadaghan sa mga tawo nga mosaksi. Kadtong Christmas tree lighting sa Fuente hilabihan ka daghan na ang misaksi nga napuno ang uptown area.

Ngano man? kini tungod kay ang mga tawo karon halos tanan mga content creator na o vlogger ug gihimo na kining livelihood ang mga events nga sama sa Sinulog busa dili layo nga mahitabo  ang gihisgotan nako nga scenario.

Karon pa lang pangandaman na kini sa LGU ug mga law enforcement agency, worst-case scenario ang ilang tan-awon. Basta isalig nato ang tanan sa Batang Hesus ang mga kalihokan subay sa Iyang Kapistahan nga luwason kita sa mga digrasya. Amen.