Nagsugod na ang pag-imprinta sa mga balota nga gamiton sa eleksyon karong Mayo 12. Problemado gyud si dismissed Mandaue City Mayor Jonas Cortes kay nakahukom na ang Comelec nga di na iapil ang iyang nga’n.
Gani, ang Comelec mipahibawo na sa Supreme Court nga nagsugod na sila pagpangimprinta sa mga balota nga gamiton sa eleksyon upat ka buwan gikan karon.
Giisip na sa Comelec nga “final and executory” ang kamandoan nga nag-disqualify kang Cortes isip kandidato pagka mayor sa Mandaue City tungod kay wa man gyud sila makadawat og order gikan sa Supreme Court.
Ambot kaha karong semanaha, kay si Cortes miduso man og dinalian nga appeal didto sa Supreme Court, pero maayo kaha og paspasan sab sa mga justices ang pagtan-aw sa iyang petisyon.
Tan-aw nako, mas dakong problema ang giatubang ni Cortes kay kang dismissed Cebu City Mayor Mike Rama, kay si Rama gitugotan pa man sa Supreme Court nga magpabilin ang iyang Certificate of Candidacy.
Sa ato pa, karong nagsugod na ang pag-imprinta sa mga balota ug kon imprintahon na ang mga balota para sa Cebu City, naa gyud ang ngan ni Rama nga apil sa mga kandidato.
Hinuon, may problema pa gihapon kay basin og mohukom ang Supreme Court nga legal ang kamandoan sa Ombudsman nga nag-dismiss ni Rama sa katungdanan tungod sa kasong Nepotism.
Sa Mandaue, kon pananglit di gyud makumbinser ni Cortes ang Supreme Court ug tangtangon gyud siya pagka kandidato tungod sa dismissal order sa Ombudsman, aw hayahay kaayo si Jonkie Ouano kay di man kaayo lig-on ang laing kandidato pagka mayor.
Dinhi sa Cebu City, dili ta makatagna kay mga lig-on ang kandidato nga sila si incumbent Mayor Raymond Alvin Garcia, Konsehal Nestor Archival, kanhi Customs Commissioner Yogi Ruiz ug si Rama.
Apan kanilang upat, makaingon ta nga mas nakapabor si Raymond kay siya man ang incumbent mayor, ug makagamit man siya sa mga mehoras sa kagamhanan aron pagdani sa mga botante.
Nindot ra ba sab og mga binuhatan si Raymond atol sa iyang paglingkod isip acting mayor dihang gisuspenso na si Rama sa katungdanan ug ilabi na dihang gipahural na siya nga mayor.
Sa bukid lang daan, ang mga pamilya nga kaniadto naproblema sa tubig karon makatubig na tungod kay gipirmahan ni Raymond ang kontrata sa unom ka private contractor sa MCWD nga wa aprobahi dayon atol sa administrasyon ni Rama.
Kining puntoha, makaapil nga makabenepisyo si Atty. Joey Daluz nga maoy kandidato ni Raymond pagka bise mayor kay si Daluz man maoy chairman sa MCWD dihang gikontrata ang JE Hydro pagsuplay og tubig gikan sa Barangay Lusaran.
Natural makahig si Daluz nga makabenepisyo kay siya man maoy botohan sa mga tawo.