Tulin pa’s manatad

Usa ka adlaw human midangop sa Korte Suprema si dismissed Mandaue City mayor Jonas Cortes aron ikwestiyon  ang hukom sa Commission on Elections nga nagkanselar sa iyang certificate of candidacy, gipagawas sa Comelec ang certificate of finality sa ilang disisyon niadtong Disyembre 27, 2024.

Kini nagpasabot nga posibling maisip na nga moot and academic o wa nay bili ang petition for certiorari nga giduso ni Cortes didto sa Korte Suprema.

Tumong sa certiorari aron pugngan ang Comelec nga ikanselar ang COC ni Cortes. Apan unsa pa may pugngan kun hingpit na kini nga gikanselar basi sa certificate of finality nga giluwatan sa clerk sa Comelec?

Ang regional director hinuon sa Comelec dinhi sa Central Visayas nga si Atty. Francisco Pobe mipasabot nga hangtod dunay desisyon ang Korte Suprema sa petition for certiorari ni Cortes magpabilin siyang isipon nga kandidato pagkamayor sa Mandaue.

Alang niya dili pa maisip nga final ang desisyon bisan duna nay entry of judgment sanglit dunay appeal nga gihimo ang kampo ni Cortes.

Kun atong sabton ang iyang pamahayag tataw nga daw sa gidali-dali sa Comelec en banc ang pagpagawas og finality of judgment bisan luyo sa kasayuran nga niapelar ang kampo ni Cortes. Kun unsay rason nganong tulin pas manatad ang ilang hukom, ang mga commissioner ra gyuy nasayod.

Giklaro sab ni Pobe nga malakip gihapon ang pangalan ni Cortes sa official ballot nga sugdan na og imprinta karong Enero 6.

Kun ugaling dili pabor ang hukom sa Korte Suprema ang tanang boto nga iyang makuha atol sa eleksiyon isipon nga way bili o stray vote.

Ang pamahayag ni Pobe naghatag og dyutay’ng alibyo sa kakulba sa kampo ni Cortes nga dili na malakip iyang pangalan sa opisyal nga listahan sa mga kandidato.

Ang dakong pangutana hinuon kun sama ba og baruganan ni Pobe ang mga commissioner nga una ng mipabor pagkanselar sa COC ni Cortes.

Apan alang nako husto ang baruganan ni Pobe. Hinaot managhan pa ang mga opisyal sama niya nga patas ug klarong way gipaboran.

Hinaot way moabot nga kamanduan aron siya balhinon human sa maisogon niyang pamahayag nga klarong sukwahi sa baruganan sa iyang mga labaw didto sa kaulohan.