Unsay buhaton kun nagdoble ang birth records

Dear Atty. Divine,

Ang akong pag-umangkon adunay duha ka birth certificates. Kini tungod kay sa dihang nasayup ang middle name sa iyang unang birth certificate, inay gipakurihi-an, giparehistro hinuon og usab sa akong igsuon ang akong pag-umangkon ngadto sa Local Civil Registrar. Karon mikuha sila og kopya sa birth certificate sa bata kay mo-eskwela na, nahibaw-an nga nag double ang birth records sa bata ug ang gi-release sa PSA mao ang iyang una nga birth certificate. Ang akong pangutana kun unsay buhaton karon sa akong igsuon aron masulbad kining double registration sa birth records sa iyang anak? Daghang salamat. -- Cayla

Dear Cayla,

Duha ka lakang ang kinahanglang buhaton sa imong igsuon, ang una, iyang ipa cancel ang ikaduhang birth certificate sa iyang anak. Ang petition for cancellation of birth certificate adto ipasaka sa korte diin marehistro ang bata. Aduna kini hearing ug kinahanglan nga mokuha og abogado ang imong igsuon nga mao morepresentar kaniya ngadto sa korte. Matangtang lang ang ikaduhang birth record sa imong pag-umangkon kun ma grant sa korte ang maong petition. Samtang ang ikaduhang buhaton sa imong igsuon aron matarong na ang birth record sa bata, iyang pakurihi-an ang sayup nga entry sa unang birth certificate. Ang correction sa middle name sa first birth certificate, kun spelling lang ang nasayup niini og dili substantial ang kausaban, mamahimo ra kini niyang i-file direkta sa Local Civil Registrar diin marehistro ang bata. Mas maayo nga moadto siya sa Local Civil Registrar aron makapangayo siya og list of requirements alang sa pagpa correction sa birth certificate. Once ma cancel na ang ikaduhang birth certificate ug makurihi-an na ang first birth certificate hayan usa nalang ang birth record sa imong pag-umangkon ug ang gikurihi-an nga birth certificate mao na kini ang i-release sa Philippine Statistics Authority kon PSA. Thank you and God Bless. -- Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo