Trapik gyud kayo

Ayaw mo kahibu’ng nga pipila ka adlaw gikan karon, makasinati ang Dakbayan sa Sugbo og grabeng problema sa traffic kay kontrolahon na man ang mga sakyanan nga mosu’d duol sa Basilica del Santo Niño tungod sa mga kalihokan kabahin sa piyesta senyor.

Gani, ang mga eskina nga nahimutang sa unahan pa sa Basilica, gibutangan na og mga arko kay anha ra kutob ang mga sakyanan aron nga dili maglisud ang mga tawo nga manimba.

Nagpasabot kini nga kadtong mga sakyanan nga pagka karon makaagi pa diha kilid sa Basilica, kon sirad-an na ang karsada, adto na ang mga sakyanan magpunsisok sa mga kanait nga karsada… resulta, motrapik gyud.

Awhag nako sa mga dunay sakyanan nga kon pwede, ayaw na lang ninyo dad-a ang sakyanan duol sa Basilica kay aron nga dili kamo makadugang sa problema. Kon magpataka mo’g parking, basin mosamot ang problema kon i-clamp ang inyong sakyanan.

Pagka karon, giandam na ang mga kalihokan sa Sinulog Grand Parade nga ibalik na sa naandan nga carousel type ug anha na himoa ang showdown sa Cebu City Sports Center.

Ang mga Sinulog dancing contingents anha motuyok pagsayaw sa P. Del Rosario Street, Imus Avenue paingon sa Caretta, liko sa General Maxilom Avenue lahos sa Fuente Osmeña, unya liko sa Osmeña Boulevard paingon na sa Cebu City Sports Center.

Gilauman nga karong ibalik na ang rota sa Sinulog Grand Parade diha sa naandan nga dapit, mas moalegre ang kalihokan kay kaniadtong miaging tuig, wa kaayo’y nanan-aw sa kalihokan nga didto gihimo sa SRP.

Pagka karon, gipapaspasan ni Cebu City Mayor Raymond Alvin Garcia ang paghimo sa grand stage diha sa Cebu City Sports Center nga anha mohimo’g showdown ang mga mananayaw sa lainlaing dancing contingents karong Enero 19.

Pero ayaw mo’g kalimot paghapit usa sa Basilica ug sa pagkuyog sa solemn procession sa Santo Niño unya sa hapon sa Enero 18.

* * *

Nakadungog mo sa balita? Nakabasa mo sa news nga dunay underwater drone nga napalgan didto sa Masbate ug gituohan nga iya kini sa Chinese government?

Ang maong underwater drone nga may gitas-on nga hapit dupa, gigamit kini pagpaniid sa kadagatan sa atong nasud. Wa gyud tay dag-anan sa China kay hitsas sila og kagamitan.

Matud pa nga ang maong underwater drone, maka-send og kumunikasyon kon unsay iyang maobserbahan sa mga dapit nga iyang maadtoan.

Kon nagpa-operate man gani og underwater drone ang China aron panid-an ta, labaw na nga dunay drone nga gipalupad sa ibabaw sa atong nasud. Kinahanglan nga ang atong Armed Forces, mag-inabtik gyud.