Malipayong Pasko kaninyong tanan

Ang Pasko gisaulog matag petsa 25 sa Disyembre sa mga Kristiyanos alang sa paghandum sa pagkatawo ni Jesus nga gituohan nga anak sa Ginoo. Ang Christmas sa ininglis gikan kini sa pulong Mass of Christ or Jesus.

Ang pagsaulog sa adlaw nga natawhan ni Ginoong Jesus dili lamang kini usa ka dakong holiday o fiesta. Dili lamang kini mahitungod sa pagbutang og mga dayan-dayan sa kabalayan, kadalanan, plaza ug mga opisina o edipisyo kun dili usa kini ka dakong oportunidad sa paghunong sa makadiyot sa atong mga gimbuhaton aron atong ipaabot ang dako nato nga pagpasalamat sa gugma, paglaum o panghinaut ug kamaya  nga atong napalgan kang Ginoong Jesus nga higala ug manunubos.

Samtang nakig-ilis kita og regalo sa atong mga mahal sa kinabuhi, higala ug mga kaila, paghinumdom kini sa gasa sa Ginoo alang kanato nga mao si Jesus Christ.

Ang gasa sa gugma sa amahan, gasa nga nagpasabot nga wala ka nag inusara ug gasa sa paglaum alang sa umaabot.

Ang imong pagsaulog sa Pasko ning tuiga dili siguro sama sa miaging tuig. Seguro daghan ka og regalo nga nadawat karon kay sa miaging tuig nga imong gibutang sa Christmas tree apan angayan natong hinumduman nga ang tinuod nga kahulogan sa pasko dili ang gidaghanon sa regalo nga atong nadawat o ang kadaghan sa pagkaon nga atong giandam alang sa Noche Buena.

Ang mensahe sa pasko wala mausab kun gituyokan ka sa mga sakop sa pamilya o ba kaha adunay usa ka sakop wala makauban karon nga pasko.

Dili kini maapiktohan sa balay nga imong gipuy-an o wala nimo gipuy-an kay ang kahulogan sa pasko mao ang gugma sa Ginoo kanatong tanan, nga ipabati kanimo nga wala ka mag inusara, nga ikaw gihigugma, may paglaum ug malipayon.

Malipayong Pasko kaninyong tanan.