Wa gyud kapugngi

Bisan pa og dunay pamahayag si Presidente Bongbong Marcos nga dili siya pabor nga himoan og impeachment complaint si Vice President Sara Duterte, pero duna gyuy mga tawo nga misang-at gihapon og impeachment batok ni Inday Sara.

Gipasakaan og impeachment complaint si Inday Sara kay matud sa mga abogado, kaparian nga nagtinguha nga matangtang sa katungdanan ang vice president, nawad-an na kuno sila’g pagsalig kaniya tungod sa giingong pagwaldas paggasto sa kapin 100 milyon nga intelligence funds.

Nakasabot ko nga dili mamandoan ni Presidente Marcos ang tanan nga pasagdan na lang si Inday Sara, ug awhagon na lang nga mosumiter kini og kwentada giunsa niya paggasto ang gipiyal kaniya nga intelligence funds.

Ang nakabentaha lang ni Inday Sara kay bisan og nag-atubang siya’g imbestigasyon kabahin sa pag-ingon niya nga kon dunay mahitabo kaniya, may tawo na siyang gisugo aron patyon si Presidente Marcos, ang iyang asawa nga si Liza ug si House Speaker Martin Romualdez, taas gihapon siya’g rating.

Sa ato pa, nagpabilin nga daghan pa sa katawhan ang misalig gihapon kang Inday Sara. Husto si Presidente Marcos nga dili na lang unta pasakaan og impeachment complaint si Inday Sara, kay ang pagpahigayon sa impeachment proceedings, wa nay mahimo ang mga magbabalaod.

Ang tanang mga senador maoy magsilbi nga huwes ug maoy mopahigayon sa impeachment proceedings, apan nasayod baya ta nga gamay ra kaayo sa mga senador ang mga abogado, ang uban gani diha dili maayo mosulti og Iningles.

Aw, panid-an nato kon unsay sangpotan sa tulo ka impeachment complaint nga gisang-at na sa Kongreso.

* * *

Tan-awa, mga lalaki nga menor-de-edad nga magsige’g tan-aw og porn website sa internet, nakahimo gyud og krimen ug gitabangan nila sa pag-among-among ang usa ka 8-anyos nga babaye didto sa Toledo City.

Mao na diha nga kitang mga ginikanan, angay gyud nga modesiplina sa atong mga anak, pahimangnoan sila kanunay nga dili gyud mohimo og mga dautan nga supak sa balaod.

Kon ikaw kaha ang amahan sa 8-anyos nga babaye nga gitabangan paglugos sa upat ka menor-de-edad, dili kaha ka maghuramentado? Ang ginikanan sab sa batang babaye, nganong wa man sab nila bantayi ang ilang anak aron dili molaag kay gidala kuno sa mga lalaking barkada niini didto daplin sa sapa nga layo ra sa ilang balay.

Ubos ra ba sa balaod, ang mga bata dili basta-basta nga mapriso bisan pa og nakahimo sila og salaod. Usbon ko, atong atimanon, bantayan, giyahan ang atong mga anak aron dili sila makasubay sa mga hiwi nga dalan nga makahimo sila'g daotang binuhatan ngadto sa uban.