Sugaton na gyud nato ang Pasko karong tungang gabii, ang adlaw nga sumad sa pagkatawo sa atong Ginoo nga si Jesus Christ. Unta, malipayon ang pagsaulog ninyo sa Pasko karong tuiga.
Nasayod ko nga samtang dunay mga tawo nga nagmaya kay daghan og nadawat nga mga bonus, apan daghan usab ang nagmagul-anon, ilabi na kadtong mga tawo nga dunay mga sakop sa pamilya nga anaa sa ospital.
Usbon nako, subo kaayo kon atol sa Pasko wa kay kwarta kay maibog ka lang sa uban nga nagbaguod pagdala sa ilang mga kinompra gikan sa mga mall ug department stores.
Apan kadtong mga sama kanako nga wa kaayo buligi sa maayong kapalaran karong tuiga, akong awhagon nga dili maguol ug saulogon gihapon nato ang Pasko nga malipayon.
Karong adlawa, pangitaon nako kadtong usa ka makililimos nga nakatukbil sa akong kasing-kasing. Nakasaad ko nga karong Paskoha hatagan ko siya og pinaskohan nga makapalipay kaniya.
Dili ko kwartahan apan makamao ko mo-share og pinaskohan ngadto sa “mas nanginahanglan” ug kini mao ang usa ka tiguwang babaye nga dili gyud kanunay’ng nagpakilimos diha sa karsada.
Dili lang nako itug-an kon asa nako panagsa nga makita ang maong tiguwang nga kaniadto gituohan nako nga usa ka Badjao. Usa ka higayon, stop signal ug gipakigsultihan ko siya.
Usa diay siya ka Lola, siya ang magbantay sa iyang apo, apan kon panahon nga ang iyang apo bantayan sa inahan sa bata, modalikyat siya sa pagpakilimos aron may magamit siya alang sa iyang panginahanglan.
Dunay usa ka amigo nako nga milyonaryo, mihatag nako og bugas. Abi ninyo og unsay akong gihimo? Nanghatag usab ko og bugas ngadto sa may labaw pa kanako kapobre, gikan sa bugas nga akong nadawat.
May mga amigo ko nga nasabot gyud nako nga apiki gyud sila karong paskoha, wa sab ko magpanuko sa pagtunol kanila og bisan gamay lang nga kantidad ug nasabot nako nga gikalipay usab nila kini pag-ayo.
Ingon niana ang Pasko, paghinatagay, apan dili lang maayo nga mangayo. Kon mangayo ka, unya ang imong gipangayoan dili mohatag masakitan ka lang. Mao nga ako di gyud mangayo.
Apan nalipay ko kay bisan og wa ko mangayo’g pinaskohan, dunay mga tawo nga giswerte sa ilang kahimtang ug mipaambit kanako sa ilang naangkong swerte.
Akong ipahibawo sa mga buotan nakong mga kaila nga ang akong nadawat, hilom ko ra usab nga gipaambit sa mga mas nanginahanglan kay sa paghimo ko niini, nakapalipay ko og tawo, atol sa pagsaulog sa Pasko.