EDITORYAL - Taronga og bahin ang budget

Dunay mga retiradong opisyales sa militar, kapolisan ug coastguard nga miluwat og open letter nga nagkwestyon sa pamaagi sa pagbahin-bahin sa 2025 budget.

Natural lang mga kwestyonon ang budget tungod kay sa pagkakaron, dunay mga ahensiya sa gobiyerno nga nagkinahanglan og mas dakong pundo samtang duna say uban nga wala magkinahanglan aning dakong budget.

Ang Department of National Defense lang daan, dako gyud og kinahanglan nga budget para sa pagpadayun sa modernisasyon sa Armed Forces of the Philippines nga dugay na kaayong nagkamang tungod sa kinuripot nga pundong giaprubahan sa mga magbabalaod para niini.

Dunay mga magbabalaod nga nakisakay gani aning isyu sa modernisasyon sa AFP nga nagpakaaron-ingnong pabor sila sa mga gipanghimo sa kasundalohan partikular sa isyu sa proteksyon sa West Philippine Sea, apan kutob ra pud sila sa mga press releases.

Ang open letter miila sa mga gihulagway nilang dili makatarunganong pagdugang sa mga alokasyon para sa Senado gikan sa P12.830 billion ngadto na sa P13.930 billion; House of Representatives  budget gikan sa P16.345 billion ngadto na sa P33.670 billion  ug ang Department of Public Works and Highways (DPWH) budget nga nangayo ra unta og P288.6 billion apan ang naaprubahan P1.113 trillion.

Samtang tuod og napun-an og kapin P8 bilyones ang pundo sa DND , ang gahin para sa AFP Modernization Program niini nga P50 bilyones para sa sunod tuig, gikuhaan og  P15-bilyones.

Nagtuo baya ang katawhan nga karong adunay tension sa WPS mugna sa padayong agresibong mga kalihokan sa China, magtarong na ang mga magbabalaod ug moseryuso na sa paghatag og prayoridad sa AFP modernization.

Gawas sa AFP, naa pay ubang ahensiya nga nagkinahanglan og dakong budget, sama sa edukasyon, agrikultura, panglawas ug uban pa.

Naobserbahan sab nga daw giprayoridad karon mao ang budget para sa ayuda, unsa man ni para “panuhol” o pag-ulog ulog sa mga botante? Eleksyon na baya sa sunod tuig. Wala pa hinuon kini pirmahe ni Presidente Ferdinand Marcos Jr.   Maayo unta og basahon kini og maayo sa pangulo ug panangtangon ang mga dili importanteng padak-an og budget.