Sa dili pa ka motuo sa pangangkon sa mga Duterte nga nitalaw ang administrasyon sa pagduso sa impeachment ni Bise Presidente Sara Duterte, hinumdomi nga dili ilang alyado ang nipasaka sa tulo ka impeachment complaints.
Pero dili mangiyugpos. Obligado silang motuki sa mga reklamo. Kon dili suportahan sa 103 ka kongresista, mabasura kay dili silay nagpasiugda. Kon ilang suportahan, ma-impeach dayon si Duterte inig balik sa sesyon sunod buwan. Dili kinahanglang tiwason dayong impeachment trial sa Senado. Mahimong ipadayon liwas sa eleksiyon nga posibleng mas daghan nang alyadong mga senador.
* * *
Dili tinuod ang intriga nga wala magkasabot silang Presidente Ferdinand Marcos Jr. ug House Speaker Martin Romualdez sa impeachment. Sukwahi sa pangangkon ni Marcos Jr. nga iyang gitahud ang ka-independente sa House, tanang lakang ni Romualdez dunay bendisyon sa Malakanyang.
Maong bisan nideklarar kunohay ang presidente nga dili makaayo sa katawhan ang impeachment, nanumpa ang mga kongresista sa pagpadayon sa ilang mga imbestigasyon batok sa mga Duterte ug nangangkon na si Romualdez nga ang institusyon maoy magsilbing truth commission nga mobisto sa bangis nga mga krimen sa niaging administrasyon.
* * *
Palihug ayaw palingla nga nagbuut-buot silang Romualdez ug Senate President Chiz Escudero pagpahiyos sa budget sa kahimsog ug edukasyon ug pagpaburot sa Ayuda sa Kapos Ang Kita Program (AKAP) ug ubang ayuda ug pork barrel projects.
Napugos na lang si Marcos Jr. paglangay sa pagpirma ug pagsaad nga usbon ang labing kuwestiyonable nga mga probisyon sa 2025 budget tungod sa sibaw nga pagsaway sa publiko (labi na karong nisupak sang retiradong mga opisyal sa militar ug kapolisan).
* * *
Maong makapatay-og ang rekomendasyon sa House Quad Committee pagkiha ni kanhi Presidente Rodrigo Duterte sa paglapas sa International Humanitarian Law tungod sa extrajudicial killings ug reward system sa iyang drug war. Kay lahi sa impeachment complaints nga gipasagdan, nilihok dayong tibuok makinarya sa gobyerno paghipos og dugang ebidensiya batok sa kanhi presidente.
Samtang nipahibawo nga supinahan nilang kanhi presidente ug ipaubos sa Witness Protection Program (WPP) ang resource persons sa QuadComm nga makapalig-on sa mga kaso, gipahibawo sa Department of Justice (DOJ) nga mabinantayon sila aron nga dili masapawan ang nakabuylo nang imbestigasyon sa International Criminal Court (ICC).
* * *