Utang sa CHAMP

Burukrasya sa gobyerno maoy gitumbok ni Mayor Raymond Garcia nga hinungdan nganong nagtipun-og ang utang sa syudad ngadto sa mga pribadong tambalanan nga katambayayong sa dakbayan pagpatuman sa City Hospitalization Assistance and Medicines Program o CHAMP.

Sigun sa record, mosumada og P2.4 milyones ang kinatibuk-ang bayranan sa syudad ngadto sa mga hospital sukad paniadtong tuig 2020 hangtud sa 2023. Lakip sa mga hospital nga wala mabayri sa dakbayan mao ang Chong Hua (P1.7M); Adventist Hospital (P352,476); Perpetual Succor (P60,000); Cebu Velez Hospital (P92,647); Sacred Heart Hospital (P372,069); Cebu City Medical Center (P135,000); Cebu Doctors’ University Hospital (P309,142; Saint Vincent Hospital (P18,430); ug uban pa.

Bisan ilang giangkon ang wala pa mabayring utang sulod na sa upat ka tuig, apan ilang gihimakak nga dunay mga pasyente nga gibalibaran sa mga tambalanan tungod kay wala makabayad ang syudad. Si Garcia uban sa pangulo sa CHAMP Office nga si Jojo Lingao-lingao mitug-an sa media nga dili tinuod nga gibalibaran sa mga tambalanan ang mga pasyente sa CHAMP.

Apan kun ang ubang konsehal ang pangutan-on, matud nila nga dunay mga pasyente nga wala gyud dawata ang letter of authority (LOA) gikan sa CHAMP. Buot ipasabot nga personal nga bago sa mga pasyente ang ilang bayranan.

Mahimong dili physical nga gibalibaran sa mga tambalanan ang pasyente, apan ang pagdumili nila pagdawat sa LOA tabla ra nga ilang gibalibaran ang pasyente. Dili nalang nato ipaagi sa pinilosopo, ang dili matuis nga makatuoran mao nga inutil ang syudad pagtuman sa obligasyon niini. Dili hinuon nata mapakasala si Garcia niini tungod kay iya lang nasunod ang maong problema gikan sa mga nag-una niya nga mayor. Apan hinaot nga iyang mapangitaan og sulbad ang problema aron di nan i masubli sa moabot nga mga higayon.

Burukrasya man kaha ang hinungdan niini, pangitai og paagi nga masulbad ang burukrasya ug mapadali ang pagbayad sa mga obligasyon labi pa sa serbisyong medical. Ang konswelo hinuon mao nga giaprobahan na sa konseho sa dakbayan niadtong miaging semana ang Supplemental Budget aron mabayran ang maong mga utang.

Sayod raba ta unsay paagi sa mga pribadong hospital—dili gyud na sila paalkansi. Bisan tua na sa sulod imong pasyente adlaw-adlawon ka og paningil labi pa kun dako na kaayo imong bayranan. Kinahanglan ka nga magdugang og deposito.