Ayaw pangayo'g pinaskohan

Way giganahan pagkomentaryo sa akong post sa social media nga dili maayong mangayo’g pinaskohan, kay para nako ang tukma gyud mao nga maghuwat ra ta nga dunay mohatag kanato og gift.

Nindot kaayo ang imong pagabation kon masurprisa ka na lang nga may motawag ug magpahibawo nga dunay gipadala nga gift para nimo gikan sa imong kaila nga wa gyud nimo pangayoi.

Kay kon pangayoan gud nimo, basin og balibaran ka lang ug ingnon nga lisud kaayo karon ang panahon ug dili siya makahatag nimo og pinaskohan, basin og mahiubos ka hinoon.

Usa ka ilado kaayong negosyante sa Sugbo, kausa ra mi magkita niya sa personal, apan usahay magka-communicate mi sa social media, nanawag nako kaniadtong miaging semana.

Giingnan ko niya nga duna siya’y ihatag nga gift sa mga suod kaayo niyang mga higala. Akong gihatagan, ug nagpasalamat ko niya daan kay bisan og wa ko mangayo, hatagan ko niya.

Kagahapon sa buntag, may mitawag nako nga mga kawani diay sa maong negosyante. Nangutana kon asa nila ihatud ang akong gift. Giingnan nako nga adto lang sa gwardya sa Mariner’s Court building nga naa ang DYLA, kay announcer man sab ko sa maong radio station.

Pag-adto nako, sus nakurat ko kay usa ka sakong bugas humay, nga naglisud gani ko pag-alsa aron ikarga sa akong sakyanan. Gipasalamatan ko ang amigo nako nga negosyante.

Wa abti’g usa ka oras, nanawag nako pagbalik ang kawani sa maong negosyante, ug nangutana kon hain na ko. Pun-an kuno ko nila og laing usa ka sakong bugas ug may mahalon pa nga bino.

Tuod, duha gyud ka sakong bugas ang akong nadawat. Lipay kaayo ko kay wa gyud ko magdahom nga hatagan ko sa maong pinaskohan. Taud-taud, may nanawag na sab nga staff sa usa ka opisyal, ug nangutana asa nila ihatud ang akong gift.

Diha ko nakaingon nga husto gyud ang akong gisulti nga kon dili ka magsige’g pangayo, magpaabot ra kon may mohatag, moabot hinoon ang wa nimo paabota nga Christmas gift.

Abi ninyo og unsay akong gihimo? Usa nako ka amigo nga mitug-an nako nga naproblema gyud siya sa pamugas, akong gibahinan sa bugas nga akong nadawat, ug gipakapinan pa’g kwarta.

Ingon niana ang diwa sa Pasko, wa man siya mangayo nako, pero boluntaryo ko nga mihatag. Apan dunay usa nako ka kaila, kaniadtong miaging semana, nangayo na’g pinaskohan.

Nakahinumdom lang siya nako kay miabot na ang Pasko, apan wa gani mamati kanako nga magprograma ko sa radyo ug makita, madungog sa social media.

Unya, sundon ba ninyo ang akong gihimo nga di gyud mangayo og pinaskohan? Kon ipatawag mo kay hatagan, kana adtoa, apan ayaw pangayo.