Pabotaran sa dili pa ihawon

Gidepensahan sa pamunoan sa Kongreso ang P26 billion nga pundo sa Ayuda Para sa Kapos ang Kita Program (AKAP) nga gisulod sa 2025 budget uban ang pagpangulipas nga wala nila gamita ang maong programa isip himan sa pamolitika labi na sa umaabot nga eleksiyon. Bisan sa pagpangulipas, tataw nga pamolitika ra ang katuyoan sa AKAP tungod kay ang gitumbok nga makapahimulos sa maong programa mao man ang mga kabos.  Haum ang programa sa panultihon nga, “Kon makabotar pa ang mga baboy, ang tawo nga nagbitbit sa balde nga gisudlan sa pasaw mao gayod ang ilang botaran isip pangulo bisan pa man kon ihawon ra sila sa ilang gipili sa kapulihay.”  Madahaan!

Hungit bisan nagsamual

Samtang gidebatehan sa kongreso ang paglaslas og P12 bilyones sa budget sa DepEd sa tuig 2025, nabutyag usab ang usa ka kritikal nga isyu nga hinay diay kaayo mogasto sa ilang pundo ang maong ahensya. Nakakaplag hinoon og rason ang mga kongresista aron laslasan ang budget sa DepEd sa sunod tuig.  Dili maayo nga magsige lang og pangayo’g dakong pundo apan dili man diay maantigo mogasto.  Ni’ng kahimtanga, nahisama ang DepEd sa laog ug buraho nga tawo nga bisan nagsamual na ang baba, nagsige lang gihapon og hungit sa pagkaon.  Fezteleern!

Midaghan bisan dili manganak

Giluwatan sa Civil Service Commission ang Memorandum Circular No. 16, s. 2024 nga nagtugot sa mga empleyado sa kagamhanan nga magsul-ob og bisti nga nahi-uyon sa ilang gender identity sulod sa buhatan.  Mahimo na’ng magbinabaye ang mga bayot ug magnilake ang mga tomboy sa ilang pagpanapot depende kon unsay komportable alang kanila.  Ni’ng maong kalambuan, mora’g daghan ang moyagyag sa tinuod nila’ng pagkatawo.  Makatuaw na usab kita sa pagpangutana nga, “Ngano’ng midaghan man ang mga bayot nga dili man unta sila manganak?”  Ateerr!  

Puto’ng nanga-bahaw

Nasagmuyo ang mga mamaligya-ay og “puto” sa dakbayan sa Lapu-lapu tungod sa dako kaayong pagkunhod sa ilang halin bisan ni’ng panahon sa Misa de Gallo.  Usa sa gitumbok nga hinungdan mao ang pagmahal sa maong palaliton.  Kon sa una tag-P5 lang kini, karon tag-10 na ang buok ug medyo nikuyos na usab ang gidak-on niini.  Dili kini ikahibulong kay daghan na man ang kompetensiya sa puto sama sa burger, French fries ug uban’g mga piche-piche.  Matud pa sa akong amigo, “Gihinganlan man unta kini og “puto’ng pinalutaw” apan kay wala man mahalin, nganlan na kini’g “puto’ng nanga-bahaw.”  Pagkatoytoy!

Rockin’ ‘60s goes ballroom

Usa ka Fund Raising Project ang gipasiugdahan sa Rotary Club of Metro Cebu sa tumong nga makatigom ug pundo alang sa pagpahigayon sa ilang 2025-2026 medical missions ug uban’g poverty alleviation project.  Giulohan ang maong proyekto nga “Rockin’ ‘60s Goes Ballroom,” usa ka post Sinulog dinner concert REUNION sa mga Cebu Baby Boomers.  Pagahimoon ang maong dinner/concert karon’g Enero 23, 2025 didto sa Mandani Bay, North Reclamation Area, Mandaue City.  Mogahin ang maong dinner/concert og 1-1/2 ka oras nga non-stop nga tukar sa mga sikat nga awit sa 1960’s ug laing 1-1/2 ka oras alang sa ballroom dancing.  Kadtong interesado, mahimong magpareserba daan pinaagi sa pagtawag ni Raul sa numero 09178521620. First come, first serve basis ang reservation.  Manayaw na ta!