Nagkadena nga krimen sa pamilya

Gikalaamarma kini sa mga tinugyanan sa balaod subay sa sunodsunod nga dugoong panghitabo nga naglambigit sa mga sakop sa pamilya sama sa nahitabo didto sa Bacong sa Negros Oriental diin gipamusil patay sa amahan ang iyang duha ka mga anak nga gagmay pa.

Dayon gisundan sa dakbayan sa Carcar diin gipusil patay sa usa ka lalaki ang iyang uyab ug giamong pa niini ang anak nga dalagita sa babaye niini. Ug ang nahitabo sa dakbayan sa Talisay diin gipamusila sa 67 anyos nga padre de pamilya ang iyang asawa ug duha ka anak. Wala man maintimano ang mga biktima apan ang suspek maoy namatay kay giatake sa kasingkasing.

Nahitabo kini sulod lang sa hamubo nga higayon nga daw nagkadena ang krimen nga gilambigitan sa mga sakop sa banay nga dili bastabasta kay aduna gyuy mga nangamatay nga daw horror nga salida sa pelikula ug telebisyon.

Bisan og naglambigit kini sa pribadong kinabuhi sa mga nalambigit nga pamilya apan maghatag kini og dautan nga impression sa mga tawo nga nakasinati usab og susama nga problema karong panahona, sama sa mga nahitabong hikog nga kong adunay mabalita nga ingon niini, magsunodsunod usab ang mga suicide incident, kining family related tragic incidents nagtakod takod usab.

Matud sa tigpamaba sa Police Regional Office 7 nga si P/Lt.Col. Janette Rafter nga bisan og isolated ra kini nga panghitabo apan gikinahanglan nga matutokan usab kini sa mga ahensiya aron mahatagan og intervention sa ingon malikayan nga mosangpot kini sa dugoon nga panghitabo.

Sa side sa kapolisan, andam sila modawat sa mga reklamo ug ilang paminawon ang gipamati nga dautang pagbati sa mga tawo. Matud ni Rafter nga ang pagdangop sa sama kanila nga law enforcer wala magpasabot nga duna nay dakpon o ibalhog sa bilanggoan kon dili mamahimo usab sila nga mohatag og pagpasabot sa mga tawo kong unsa ang angayan nga buhaton sa mga problema nga gihambin ilabi na sa mga sakop sa pamilya.

Angayan usab nga modangop sa mga experto sa pagbati ug sa relasyon sa pamasin nga magaangaanan ang mga gibati nga kaligotgot sa mga tawo ngadto sa ilang kaugalingon nga mobanda sa mga sakop sa ilang pamilya. Kon dili na gyud madala mao na ang panahon nga mangita na og pamaagi nga molingkawas sa relasyon nga nga hilabihan na ka bug-at ug dili na paabuton nga mobuto kini kay hilabihan ka delikado kay makamatay.

Bisan unsa ka bug-at ang suliran nga gipas-an sa usa ka tawo mamahimo ra kini niyang madaug kong adunay moagak ug mosagakay kaniya aron makapadayon. Dili maayo nga tugbangan og kasuko ang gibating kalagot sa usa ka tawo kay mosilaob kini ug moulbo.

Sama sa gipadayag sa anak sa retired seaman nga nagbasol siya nga wala niya tinggi ang iyang amahan sa taas nga panahon nga siya ra man unta ang kasumbongan sa mga problema niini. Misangpot sa depression ang gibati sa amahan ug mibuto gyud nga misangpot sa kamatayon niini ug hapit usab sila mahurot tibook pamilya.

Dili angayan ibalewala ang depression kay kong dili kini matabang peligro gyud ang sangpotanan.