EDITORYAL — Unsa ang Misa de Gallo para sa kabataan

Gisugat sa mga magtutuo sa Simbahang Romano Katoliko kagahapon sa kaadlawon ang labing unang Misa de Gallo nga mao say senyales sa pagsugod na sa nobenaryo padung sa adlaw nga natawhan ni Hesukristo sa Disyembre 25.

Sama sa naandan, daghan gyud kaayo ang manambong sa unang adlaw, ilabi na sa mga kabataan. Hinuon dili tanang kabataang nisimba, nanimba gyud. Kay ang uban nagkuyog lang sa ilang mga barkada o ba kaha sa ilang mga hinigugma.

Samtang dunay uban nga miisa ang kilay kay ang uban aning mga bataa nagsige ra og tabi ug wala maminaw sa misa, angayan lang tingaling hatagan gihapon sila og konsiderasyon tungod kay sagad gyud ani nila wala makatuhop sa kahulogan sa maong misa.

Apan ang pari sa Our Lady of the Sacred Heart Parish sa Marigondon, Lapu-Lapu City sa iyang wali sa unang adlaw sa Misa de Gallo nga nilanat og usa ka oras, gihimug-atan niya nga kasaysayan sa maong relihiyosong kalihokan ug koneksyon niini karon sa modernong kabataan.

Kun itandi man gud ang kabataan sa karaang panahon, kun motambong gani og misa, kauban gyud sila kanunay sa ilang mga ginikanan o katiguwangan sa ilang banay. Motupad og lingkod sa ilang banay ug seryusong maminaw.

Apan sa bag-ong panahon, lahi na kaayo ang mga kabataan karon kun motambong sa misa. Ang uban mosimba nalang og ila-ila nga dili kauban ilang ginikanan. Bisan gani mosimba ilang pamilya mobuwag gyud kay adton motipon sa mga barkada nga ilaha ng gikasabot daaan.

Dili na mapugos ang mga kabataan sa pagsunod sa karaan, apan mahimo pa gihapon silang matudloan sakay sa ilang uso. Kinahanglan lamang nga dunay mopasabot kanila sa ilang papel sa kaugmaong sa Simbahan.

Kay kining kabataan karon, dawaton man o dili sa mga hamtong, sila maoy kaugmaon sa Simbahan kay sila naman unya ang mahibilin.

Dili sila kinahanglang abugon o kasab-an kun makahimo og kasaypanan samtang nagsimba, pasabton lang ug tudloan unsay kahulogan sa maong relihiyosong tradisyon kay ugma damlag ilaha sab unya kining itudlo sa ilang mga anak.