Pahimos sa ayuda

Aprobado na sa bicameral committee ang final version sa balaodnon nga naglatid sa national expenditure program sa gobyerno alang sa tuig 2025.

Sigun sa House Bill 10800, ang kinatibuk-ang budget sa Pilipinas sunod tuig mobalor og P6.352 trilyones. Nasukip sa national expenditure program sa kagamhanan sunod tuig mao ang daghang pundo alang sa mga hinabang sa kabus.

Usa na niini ang P26 bilyones nga Ayuda para sa Kapos ang Kita Program (AKAP). Wala pa ni labot sa naandang gahin alang sa Pantawid Pamilyang Pilipino Program o 4Ps nga gipatuman pinaagi sa Department of Social Welfare and Development (DSWD).

Ang AKAP usa ka pinasahi nga programa sa kagamhanan nga gitumong paghatag og suporta sa mga minimum wage earners nga maisip nga vulnerable sa economic shock ug posibling mahagbong ubos sa poverty line.

Ang mga beneficiaries sa AKAP mao kadtong mga tawo nga dili gyud maisip nga kabus apan namiligrong mamahimong kabus kun dili maayo ang dagan sa ekonomiya---pananglitan mosaka ang inflation rate.

Aron paglikay nga mahagbong sila ubos sa poverty threshold, ang AKAP maoy paagi sa gobyerno aron sila maayudahan. Apan ang problema niining mga programa sa sa ayuda mao ang paagi sa pagpatuman.

Kun nakabantay mo gihimo ning puhonan sa politika niadtong mga naglingkod sa pwesto. Karon nga nagsing-abot ang eleksiyon, tan-awa og kinsay mga hilig mosalida mataghigayon nga dunay hinabang nga ipanghatag. Dili ba ang ang mga incumbent nga mga opisyal?—pwera sa mga buotan ug dunay uwaw.  

Gawas sa AKAP ang usa sa grabing giabusahan nga pundo sa pagkakaron mao ang AICS o Assistance to Individuals in Crisis Situations. Nganong inay DSWD mga kongresista ug incumbent man nga mga opisyal ang mosalida ug manghatag niini?

Dako ra bang lalisonon kun tinuod ba nga nakasinati og krisis ang ubang mga gihatagan sa maong hinabang. Ang uban gikatahong mga lider sa mga politiko nga suod sa luwag ang nagpahimulos.