Dunay trahedya sa scouting community sayo niining semanaha dihang tulo sa ilang mga miyembro ang nakalas ug 12 sab ang nangaangol human sila aksidenteng nakuryentihan diha sa camp site atol sa pagpahigayon og camping o jamboree didto sa Zamboanga City.
Ang Boys Scout of the Philippines miisyu na og pahibalo sa tanang councils niini sa tibuok nasud nga suspensuhon lang una ang tanang outdoors activities sa mga bata samtang nagpadayon ang imbestigasyon ug makakab-ot og mga polisiya alang sa kasigurohan sa kaluwasan sa mga batang partisipante.
Subo kaayo kini nga balita dili lang sa banay sa mga batang nakalas ug nangaangol, kondili sa tibuok scouting community sa nasud ug sa kalibotan.
Ang scouting usa ka maayong kalihokan o organisasyon nga kinahanglang masuwayan o masudlan sa mga kabataang Pilipino tungod makatabang kini sa pagpalambo sa ilang pagkatawo ug sa ilang pagka-molupyo sa nasud.
Gawas nga makalingaw ang mga pangbuhaton, makat-on sab ang mga bata og disiplina sa kaugalingon, pagtahod sa uban, pagtahod sa nasud ug sa Kahitas-an ug labaw sa tanan, makat-on sila pakighigalaay sa uban.
Gani halos tanang mga nahimong mga lider sa Pilipinas ug sa ubang mga nasud nakaagi gyud bisan kausa sa tibuok nilang kinabuhi ang pagkahimong scout sa panahon sa ilang kabataan, duna pay uban nga pabiling aktibo sa scouting.
Kaning maong trahedya dili unta makapahuyang sa mga ginikanan aron pasuwayon ang ilang mga anak niining importanteng pagtulon-an sa ilang kabataan.
Apan aron dili na kini masubli pa ang maong aksidente, kinahanglan gyud tingali nga repasuhon sa mga organizers ang ilang preparasyon sa ilang mga kalihokan sa umaabot nga panahon.
Siguraduhon unta nila nga luwas gyud ang venues ug dili isalig ang tanan sa mga lokal nga gipangtahasan kondili, doblehon gyud nila kini pagsusi aron walay masipyat.