Sa wala pa siya motak-om sa mga pangutana sa mga kongresista kon giunsa pagasto ang iyang confidential funds, si Bise Presidente Sara Duterte niboluntaryo sa paghatag sa katin-awan nga gikinahanglan ang confidential funds sa pagpatuman sa tanang programa sa Office of the Vice President (OVP):
Gitumong ang mga programa sa paghaw-as sa katawhan gikan sa kakabos ug sa pagpalambo sa kahusay ug kalinaw; maong
Kinahanglan silang mag-surveillance pinaagi sa pagpamalit og kasayuran nga mogiya nila asa ang mga lugar ug kinsa ang mga molupyo nga labing nagkinahanglan sa mga programa.
* * *
Lisod sabton nganong nigasto ang OVP og minilyon ka pesos sa surveillance operations ug bayad sa informants pagpatuman sa:
Libreng Sakay (dili tingali mga espiya ang gikinahanglan, kay walay hulga sa terorismo sa kadalanan gikan ug paingon sa OVP satellite office sa Escario ug South Road Properties, kon dili ang pagklaro sa ruta ug schedule sa OVP bus); o
Medical assistance (nagkinahanglan og mga espiya kon nagdudang mga kumander sa New People’s Army ang mga pasyente, mas gikinahanglang katin-awan nganong usa ra ka botika ang kapalitan og mga tambal).
* * *
Nisamot hinuong pagduda nga gibolsa ang confidential funds sa nadiskubrehan sa Commission on Audit (COA) nga mga bulilyaso pagpatuman sa mga programa sa OVP:
Walay klaro kinsa ang 146,274 ka mga estudyante nga nakadawat ug kon na-apud-apod ba gyong P40.5 milyones nga balor sa school supplies; ug
Nausik ang P150 milyones nga budget sa “Mag Negosyo Ta Day” program kay P600,000 (0.04%) ray nagamit sa upat ka beneficiaries gikan sa ka 578 ka mga aplikasyon.
* * *
Duna pa gyoy laing pakauwaw si Duterte bisan, o tungod, sa confidential funds. Nangangkon ang OVP nga nakagasto og P176 milyones sa pagpanghatag og mga hinabang sa mga biktima sa katalagman sa 2023:
Pero wala kapakita og lista kinsa ang nakadawat sa unsa nga mga hinabang;
Nangangkon ang OVP nga nakalusad og relief operations para sa mga biktima sa lima ka katalagman sa Oktubre 5 hangtod sa Disyembre 29, 2023 pero wala kahingalan sa mga bagyo ug sa mga lugar nga naapektahan; maong
Nagduda ang COA sa katinuod sa mga pangangkon sa relief operations.
* * *