EDITORYAL - Panahon sa pagpaambit

Pipila ka mga local government units sa Sugbo ang nikanselar sa ilang bonggang Christmas parties karong kapaskohan agi og kaikog ngadto sa mga biktima sa katalagman sa nanglabay nga mga adlaw.

Makiangayon kini mga desisyon, kay gibansagan man silang mga opisyales sa lokal nga kagamhanan sila maoy adunay kahibalo sa sitwasyon sa mga nabiktima sa mga katalagman.

Ang pagpadaplin una aning bonggang mga parties karong Paskoha sa mga LGUs pagpakita kini og kaakohan, dili sa ilang konstituwente lang kondili sa uban sab bisan dili ilahang botante.

Sa pagkanselar niini makadaginot og dako-dakong budget ang LGUs kay inay mogasto og dako para sa venues, sa pagkaon, mahalong mga bino, sound systems, lightings, emcees, talents nga molingaw sa mga tawo ug bisita, ug daghan pa.  Gawas pa, kung dili ibalik sa panudlanan aron magamit sa mas importanteng galastohan para daghan pang maserbisyohang konstituwente.

Pwede sab kining gamiton pagpalit og mga hinabang para sa mga biktima sa katalagman ug himuon kining pinaskohan kanila sa panahon nga sila naglisod sa ilang kabutang karon.

Dili na kini bag-o, kay sa nangaging mga katuigan matag adunay dagkong kalamidad ug trahedya nga nasinati sa katawhang Pilipino, boluntaryong kanselahon sa mga LGUs kining mga parties.

Panahon karon sa Pasko ug tanang mga Pilipino gitudloan gikan sa pagkabata ang pagpaambit sa mga nagkinahanglan.

Saludo sa tanang LGUs apil na ang mga pribadong sektor nga nikanselar sab sa ilang parties tungod sa samang rason.