Gustong ibaligya ang portion sa property sa iyang inahan

Dear Atty. Divine,

Adunay property ang akong mama ug iya na kining gibahin-bahin daan namong mga igsuon. Apan ang titulo niini nakapangan pa gihapon ni mama. Ang akong usa ka igsuon nagtinguha sa pagbaligya sa iyang share. Ang akong pangutana, makabaligya ba ang akong igsuon sa portion sa maong property nga buhi pa man ang among inahan? Daghang salamat.

Irene

* * *

Dear Irene,

Ang mga anak dili makapanghilabot sa property sa mga ginikanan samtang sila buhi pa. Kini tungod kay ang katungod sa pag-inherit sa mga anak sa iyang mga ginikanan mahitabo lang kon mawala na sila dinhi sa kalibutan. Sa kaso sa property sa imong mama, legally, ang imong mama pa gihapon ang tag-iya niini bisan pa kun iya na kining gibahin-bahin sa mga anak, gawas lang kun mi execute na siya og Deed of Donation sa maong property in favor kaninyong mga anak. Apan kun wa siya mo execute og Deed of Donation, dili valid ang paghatag niini kay basi sa balaod ang pagdonar og real property kinahanglan gyud kini nga in writing og notarized. Busa kon gusto mobaligya ang imong igsuon sa gi assign niyang share, kinahanglan mananghid siya sa inyong inahan og kon di mosugot ang inyong mama, way mahimo ang imong igsuon niini kay dili pa man siya ang tag-iya sa property. Thank you and God bless. -- Atty. Divine

* * *

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.