Dili gyud diay mahukman ang tawo

Ipaambit nako ang sugilanon sa nakalangkat sa number one spot sa Civil Engineer Licensure Examination nga si Engr. Francis Charles Lauta nga makapadasig niadtong mga naghunahuna nga dili makasugakod sa kursong daghan kaayo og mathematics nga subject kay lagi dili maglisod man kong numero na ang hisgotan.

Atol sa akong interview sa topnotcher, gisaysay niya nga dili siya kasarangan nga estudyante dihang nagtungha siya sa elementarya ug high school apil na sa college, dili kasarangan nga "naning" matud pa sa uban kon dili ang opposite niining batasana ang iyang gihuptan.

Gani naa pay panahon kaniadto nga mag cutting classes siya kay lagi bugoybugoy sa dihang batan-an pa. Dili sa pagdasig sa mga tinun-an diha nga maghimo sa ingon apan atong punto niini nga duna pay paglaum ang mga tinun-an nga gahimo niini basta maagak lang dili hukman.

Usa sa weakness ni Engineer Lauta ang dili niya hilig sa Mathematics. Gani dihang nag-enroll siya sa kolehiyo ang unang gipangutana niya sa unibersidad, matud niya, nga "Unsay kurso ninyo nga dili kinahanglan mag entrance exam?" Dihang nasayran niya nga civil engineering puwede dili mag-entrance exam mao nalang ang iyang gikuha.

Uban sa guidance sa iyang mga professors inanay nahigugma si Francis sa iyang kurso, pareha sa lalaking napugos sa paghigugma sa iyang partner hangtud na-develop ug nilampos gyud sa iyang gisubay nga dalan.

Human makatapos sa iyang kurso sa University of Cebu Main, nag-review usab siya sa Gellesania Review and Training Center ug didto nabansay ang iyang katakos sa pagtubag sa mga gihatag nga problema mga gipakisama niya nga actual licensure exam na gyud.

Naa kunoy lahi nga pamaagi ang iyang mga instructor nga nakabatang usab sa pagbaid sa iyang abilidad ug iya kining na-absorb nga nagamit niya sa paglangkat sa iyang gitinguha nga number one spot sa naasoyng pasulit.

Dako man og natabang ang mga tawo nga naglibot kaniya apan gipasalamatan niya ang Ginoo nga maoy tinubdan sa tanan niyang kaalam.

Kong tan-awon si Engr. Lauta medyo hilomon nga medyo bugoyon apan mipatigbabaw ang iyang paghimaya sa Dios nga maoy naghatag matud pa kaniya sa iyang gipangayo.

Kasagaran sa mga tawo hukman ang isi’g ka tawo kong makita nga wala mo-excel sa tunghaan kay lagi dili kaayo focus.

Ang uban moingon nga walay maabot kining tawhana kay lagi bugoy. Apan dili gyud angayan hukman ang tawo kay kong kinsa pa kadtong gikaminusan mao man hinuon ang pasidunggan sa kauwahian.

Nagpakita lang usab kini nga bisan og feeling nato nga dili kita maayo niini nga subject sama sa Math apan kong kat-onan lang nato nga higugmaon ang numbero ma-develop ra man diay.

Buhing saksi niana ang topnotcher nga si Engr. Lauta. Walay imposible sa tawo nga maningkamot.