Motapos naman lang ang tuig pero wala pa man nahuman ang away sa mga opisyal sa kagamhanan, ilabi na sa Kongreso nga kanunay lang nagpatawag og imbestigasyon ang
Senado ug Ubos Balay Balauranan. In aid of legislation ni ang ilang katuyoan, sa kadaghan sa ilang giimbestigahan naa pa bay napanday nga balaod nga gibase sa ilang pakisusi?
Misamot pa ka init ang sitwasyon karon kay niabot naman sa pagpa-impeach ni VP Sara Duterte busa lauman nato nga taastaas pa gyud ang kombate tali sa kampo sa bise presidente ug sa iyang mga kontra nga nahimo nang drama nga gisundan usab sa mga tawo.
Kini ang kinaham nga oportunidad sa mga kongresista ug senador nga hangol og publisidad kay makapatuyang man sila og grandstanding ug libre nga exposure for free sa mga mainstream media kay mahal baya kaayo ang rate sa mga political ads. Busa maningkamot gyud sila nga makaeksina bahala na og magkamoritsing lang ang agi.
Gipatigbabaw karon ang panimalos, patas-anay sa garbo aron lang maduot ang gusto nilang maduot apan dako kaayo kining trabahoon kay dili man magpalupig si VP Sara mosyapol ug motuhik man gyud.
Bisan pa man og nipadayag na si PBBM nga dili niya gusto ang pagpa impeach ni Sara apan nagpadayon gyud ang ubang magbabalaod sa ilang tinguha nga papason ang bise presidente pinaagi sa impeachment process.
Taliwala sa kasamok sa politika dili ang mga politiko ang mag-antos kon dili si Juan dela Cruz ang yanong Pilipino nga maapektohan sanglit makamugna man kini og dautang epekto sa serbisyo, ekonomiya ug sa panarbaho.
Inay maghimo og mga programa alang sa katawhan, giuna man hinuon nilang personal nga katuyoan. Moingon ra ba sila nga gihimo nila kini alang sa katawhan, pastilan ambot lang gyud.