Dili gyud mayo

Dili ikalimod nga mga utokan ug taas og kinaadman ang mga tawo nga nagdumala sa Department of Transportation (DOTr), apil na ang gitugyanan pagdumala sa Cebu Bus Rapid Transit system.

Kay mga kwartahan man sab ni sila, sigurado ko nga duna sila’y mga sakyanan ug makamao sila nga mo-drive. Usbon nako, mga lantip og salabotan kining mga tawhana.

Apan makaingon ko nga wa nila gamita ang ilang utok sa paghunahuna og husto aron dili makamugna og kahasol ang gipatuman nila nga pedestrianization diha sa Osmeña Boulevard.

Abi ninyo og ngano? Nakita nako nga ang gihimo nilang sidewalk, nga gipamugos gyud nila paghimo daplin sa karsada, giabot man nila lahos ngadto sa eskina.

Mga duha ka metros ang gilapdon sa gihimo nilang sidewalk nga giabot ngadto sa eskina. Sa ato pa, kon ang sakyanan moliko sa tuo (right turn) kinahanglan pa nga mokawat ang atubangan nga ligid sa pikas lane sa karsada aron nga dili maligsan ang pinabugdo nga sidewalk.

Tan-awa ra gud ninyo ang gihimo nila nga mga sidewalk diha eskina Colon ug Osmeña Boulevard, ingon man sa D. Jakosalem, miabot gyud ngadto sa eskina sa karsada.

Dili ko engineer, apan ang tukma unta mao nga ang sementado ug pinabugdo nga sidewalk adto ra kutob sa mga 10 metros gikan sa eskina aron dili makahasol sa mga moliko nga sakyanan.

Matud sa mga sakop sa Technical Infrastructure Committee (TIC) nga ang nagdumala BRT, mihimo sa project nga wa mokuha daan og permit. Nagpaila gyud sila nga hawod ug mao gyud ang masunod.

Bisan si Cebu City Councilor Rey Gealon nga maoy chairman namo sa Cebu City Traffic Management Board misuporta sa akong baruganan nga ang gihimo sa BRT management makahasol kaayo.

Tungod niini, nahukman namo sa Traffic Board nga imbitahon ang kadagkoan sa BRT management atol sa among miting ug padad-on sa ilang sketch plan aron pasabton sila nga dili maayo ang ilang gibuhat.

Unta, motingog niining bahina si Cebu City Mayor Raymond Alvin Garcia aron mabadlong ang tagdumala sa BRT ug dili madayon kining ilang proyekto nga iabot gyud sa eskina sa karsada ang pinabugdo nga aseras.

Usbon nako, kining maong aseras wa gyuy moagi niini kay init, gawas kon butangan og atop, unya kon mag-uwan mabasa ka. Naa may arcaded sidewalk unta nga kabahin sa mga building nga gitukod sa Osmeña Boulevard, nganong gipagamay pa man nila ang karsada.

Angay pa man gani unta nga palapdan ang karsada, gipagamay na man hinuon nila. Utokan lagi unta, mga bright, pero wa gamita ang ilang utok. Pastilan.